रुकुम पश्चिमका ६ स्थानीय तहको बेरुजु १३ करोड ८९ लाख

रुकुम पश्चिमका छ वटा स्थानीय तहको बेरुजु रकम करिब १३ करोड ८९ लाख १४ हजार देखिएको छ । 

महालेखा परिक्षकको कार्यालयले मंगलबार सार्वजनिक गरेको ६२औं वार्षिक प्रतिवेदन अनुसार आर्थिक वर्ष ०८०/०८१ मा यहाँका स्थानीय तहको बेरुजु रकम १३ करोड ८९ लाख १४ हजार देखिएको हो । 

छ वटै स्थानीय तहको १० अर्ब नौ करोड ५३ लाख १३ हजार रकमको लेखा परिक्षण गर्दा उक्त बेरुजु देखिएको हो । बजेट अनुपातका आधारमा रुकुम पश्चिममा सबैभन्दा कम रकम बेरुजु चौरजहारी नगरपालिकाको रहेको छ । चौरजहारीमा एक करोड ४६ लाख १८ हजार अर्थात ०.७८ प्रतिशत रकम मात्र बेरुजु देखिएको छ । यहाँ एक अर्ब ८८ करोड १३ लाख ७२ हजार रुपियाँको लेखा परिक्षण भएको थियो ।

महालेखाको प्रतिवेदन अनुसार सानीभेरी गाउँपालिकाको बेरुजु रकम ०.९० अर्थात एक करोड ६० लाख २८ हजार रुपियाँ देखिएको छ । सानीभेरीमा एक अर्ब ७८ करोड ७० लाख १६ हजार रकमको लेखा परिक्षण गरिएको थियो । 

त्यसैगरी त्रिवेणी गाउँपालिकाको बेरुजु रकम दुई करोड चार लाख ८७ हजार अर्थात १.३२ प्रतिशत देखिएको छ । यहाँ एक अर्ब ५५ करोड ७४ लाख ७८ हजार रुपियाँको लेखा परिक्षण भएको थियो । 

प्रतिवेदन अनुसार मुसिकोट नगरपालिको बेरुजु रकम दुई करोड ३९ लाख १५ हजार देखिएको छ । एक अर्ब ५८ करोड ७३ लाख ४३ हजार रुपियाँको लेखा परिक्षण गर्दा मुसिकोटमा १.५१ प्रतिशत बेरुजु देखा परेको हो । 

त्यसैगरी आठबिसकोट नगरपालिकामा १.७२ अर्थात तीन करोड ६९ लाख ८३ हजार रकम बेरुजु देखिएको छ । यहाँ दुई अर्ब १४ करोड ९८ लाख ७२ हजार रकमको लेखा परिक्षण गरिएको थियो । 

रकम अनुपातको हिसाबले सबैभन्दा बढी बेरुजु बाँफिकोट गाउँपालिकाको देखिएको छ । बाँफिकोटमा एक अर्ब १३ करोड २२ लाख ३२ हजार रकमको लेखापरिक्षण भएकोमा दुई करोड ६८ लाख ८३ हजार अर्थात २.३७ प्रतिशत रकम बेरुजु देखिएको महालेखाको प्रतिवेदनमा उल्लेख छ । 

चौरजहारी नगरपालिकाका निमित्त प्रमुख प्रशासकीय अधिकृत शेरप्रसाद ढकालले बेरुजु न्युनीकरणको प्रयास जारी रहेको र हरेक वर्ष सुधार हुँदै गएको बताउनुभयो । उहाँले प्रतिवेदनले औल्याएको बेरुजु रकम फच्योट गर्न लागि रहेको बताउनुभयो । असुल गर्नुपर्ने रकम धेरै नभएतापनि नियमित गर्नुपर्ने, नियमसंगत गर्नुपर्ने, कागज जुटाउनुपर्ने रकम बेरुजुमा रहेको उहाँको भनाई छ ।

प्रचलित कानुन बमोजिम रीत नपु¥याई, अनियमित वा बेमनासिब तरिकाले आर्थिक कारोबार गरेको बेरुजु रकमलाई बेरुजुमा उल्लेख गरिन्छ । बेरुजुलाई असुल गर्नुपर्ने, नियमित गर्नुपर्ने र पेस्की बाँकी गरी तीन भागमा वर्गीकरण गरिएको हुन्छ ।