रुकुमकाे शीतलपोखरीमा चार्जिङ स्टेशन, विद्युतीय गाडीलाई सहज

रुकुम पश्चिमको मुसिकोट नगरपालिका ४ शीतलपोखरीमा सञ्चालनमा आएको चार्जिङ स्टेशनले विद्युतीय गाडीहरुलाई सहज बनाएको छ । 

जिल्लामै पहिलोपटक सञ्चालनमा आएको यस स्टेशनले रुकुम पश्चिमबाट रुकुम पूर्व, दाङ, नेपालगञ्ज, सुर्खेत चल्ने विद्युतीय गाडीहरुलाई प्रत्यक्ष रुपमा र अन्यलाई समेत सेवा प्रदान गरेको छ । 

रुकुम पश्चिमबाट नेपालगञ्ज चल्ने बागमती प्रदेश ९५२० नम्वरको विद्युतीय हाईस गाडीका धनी हरिशंकर रावलले चार्जिङ स्टेशनले विद्युतीय गाडीहरुलाई अत्यन्त सहज भएको बताउनुभयो । मध्यपहाडी र राप्ती राजमार्गको नजिकै रहेकोले पनि सम्पूर्ण विद्युतीय गाडीहरुले सुलभ र सहजै सेवा पाएको उहाँले जनाउनुभयो । 

नेपाल विद्युत प्राधिकरण रुकुमपश्चिम वितरण केन्द्रका प्रमुख वीरमान रास्कोटीका अनुसार विद्युतीय सवारी साधनहरुको प्रवद्र्धन तथा बिस्तार र अनकुल वातावरण बनाउन लागि लागि आवश्यक सहुलियत प्रदान गरेर स्टेशन सञ्चालन गरिएको हो । गत चैत्र तेस्रो साताबाट औपचारिक रुपमा सञ्चालन गरिएको यस स्टेशनमा अहिले चार्ज गर्ने गाडीहरुको सङख्या बढीरहेको छ । 

विद्युत वितरण केन्द्रका प्रमुख रास्कोटीले विद्युतीय यात्रा मात्रै नभएर इलेक्ट्रिक भेकलमार्फत हरित र दिगो विकासमा महत्वपूर्ण योगदान गर्नसक्ने विश्वासका साथ स्टेशन सञ्चालन गरिएको बताउनुभयो । विद्युतीय सवारी साधनहरुले जलवायु परिवर्तनबाट उत्पन्न भएको समस्या न्युनिकरण मात्रै नभएर नेपालको आर्थिक विकास र समग्र यातायात विकासमा योगदान पुग्ने उहाँको भनाइ छ ।

आन्तरिक रुपमा खपत बढाउन, पेट्रोलियम पदार्थको खपत कम गरी आयात घटाउन र विद्युतीय सवारी साधन प्रयोगमार्फत वातावरणमैत्री यातायात प्रणालीको विकासमा जोड दिन चार्जिङ स्टेशन निर्माण गरिएको रास्कोटीले बताउनुभयो ।

शीतलपोखरीमा सञ्चालित चार्जिङ स्टेशनमा १६० किलोवाट क्षमताको चार्जर, त्यसमा विद्युत् आपूर्तिका लागि दुई सय केभीएको ट्रान्सफर्मर व्यवस्था गरिएको छ । वितरण केन्द्रका प्रमुख रास्कोटीले जिल्लाका अन्य दुई स्थानमा स्टेशन माग गरिएका निवेदन प्राप्त भएको जानकारी दिनुभयो । 

चार्जिङ स्टेशनमा दैनिक छ भन्दा बढी सवारीसाधनले चार्जिङ गर्ने गरेको स्टेशन सञ्चालनको जिम्मा पाएको श्री माउन्ट एभरेष्ट ईन्टरप्राईजेज एण्ड सप्लायर्सका सञ्चालक बसन्त पुनले जानकारी दिनुभयो । उहाँले क्रमशः सवारीसाधनको चाप बढ्दै गएको जनाउनुभयो । यस स्टेशनबाट एकै पटकमा तीन वटा गाडीहरु चार्ज गर्न मिल्ने व्यवस्था रहेको छ । 

पुनका अनुसार उहाँका अनुसार यहाँ साना–ठूला सबै सवारीसाधनको चार्ज गर्न मिल्छ । स्टेशन २४ सै घण्टा खुला रहने समेत उहाँले जनाउनुभयो ।