रुकुममा जीप दुर्घटनामा मृत्यु हुनेको संख्या सात पुग्यो, १० जना घाईते

रुकुम पश्चिमको बाँफिकोट गाउँपालिका ७ झारमारे नजिकै बुराउसेनीमा शुक्रबार बेलुका जीप दुर्घटना हुँदा मृत्यु हुनेको संख्या सात पुगेको छ । 
जिल्ला प्रहरी कार्यालय रुकुमपश्चिमका अनुसार मृतक सात जना मध्य छ जनाको पहिचान खुलेको छ । 

मृत्यु हुनेमा आठबिसकोट नगरपालिका २ स्याला गाउँकी ३० वर्षीया कमला ओली, आठबिसकोट नगरपालिकाकै १६ बर्षीय टेकजंग बुढा, बर्षीया दिलमाया बुढा, १७ बर्षीया मनिका ओली, १८ वर्षीया सर्मिला वि.क.र २२ वर्षीया गोपाल ओली रहेको जिल्ला प्रहरी कार्यालयका सूचना अधिकारी प्रहरी निरीक्षक हरि प्रसाद पुनले जानकारी दिनुभयो । उहाँका अनुसार एक जनाको पहिचान खुलेको छैन ।

दुर्घटनामा १० जना घाईते भएका छन् । चालक टोपजंग बुढासहित ६जनाको अवस्था गम्भिर रहेको छ । घाईतेहरुको उद्धार गरेर स्थानीय मेडिकल र जिल्ला अस्पताल सल्ले ल्याईदै गरेको प्रहरी निरीक्षक पुनले जानकारी दिनुभयो । 

शुक्रबार बेलुका जिल्ला सदरमुकाम मुसीकोट खलंगाबाट आठबिसकोट नगरपालिकाको स्यालाखदीतर्फ जाँदै गरेको रा १ ज ४२२ नम्बरको जीप आठबिसकोट नगरपालिका र बाँफिकोट गाउँपालिकाको सिमाना पर्ने झारमारे लेकमा दुर्घटना भएको थियो । 

क्षमता भन्दा बढी यात्रु रहेकोले जीप दुर्घटना भएको आकलन गरिएको छ । जीप सडकबाट सात सय मिटर तल खसको बताईएको छ ।