न्यू मुनलाइटमा शैक्षिक सामग्री प्रर्दशनी र खाद्य मेला हुँदै

रुकुम पश्चिमको मुसिकोट नगरपालिका ५ मा रहेको न्यू मुनलाइट सेकेन्डरी बोर्डिङ्ग स्कुलले शैक्षिक सामाग्री प्रदर्शनी तथा खाद्य मेलाको आयोजना गरेको छ । 

स्कुलले माघ २८ गते सोमबारका दिन उक्त कार्यक्रमको आयोजना गरेको हो । स्कुलका प्रिन्सिपल खड्क बहादुर कुवँरका अनुसार विद्यालयमा अध्ययनरत कक्षा नर्सरी देखि कक्षा ५ सम्मका विद्यार्थीहरुको शैक्षिक प्रदर्शनी मेला र कक्षा ६ देखि १२ सम्मका विद्यार्थीहरुको सहभागितामा खाद्य मेला (फुडफेष्टिबल) आयोजना गरिएको हो । 

विद्यार्थीहरुकै लगानी र व्यवस्थापनमा उक्त कार्यक्रमको आयोजना गरिएको प्रिन्सिपल कुवँरले जानकारी दिनुभयो । यो कार्यक्रम जिल्लामै पहिलो पटक हुन लागेको उहाँले बताउनुभयो । 

विद्यालयका संस्थापक तथा शिक्षक शरद गौतमका अनुसार बालबालिकाहरुले निर्माण गरेका घरायसी सामाग्रीहरु शैक्षिक प्रदर्शनीमा राखिने छ । विद्यार्थीले निर्माण गरेका हलो, जुवा, हुन्नो, सुपो, डोकाडाला, मान्द्रो लगायतका सामाग्रीहरु प्रदर्शनी हुनेछन् । 

खाद्य मेलामा भने विभिन्न १५ प्रकारका खाद्य सामाग्री प्रदर्शनी गरिने छ । विद्यार्थीहरुलाई १५ समुहमा विभाजन गरेर उक्त सामाग्रीहरु तयार गरिएको छ । मःम, चाउमिन, ललिपप, समोसा, सलाद, जुस लगायतका खाद्य सामाग्रीहरु स्टलमा राखिने र विक्रि वितरण समेत हुनेछन् । शिक्षक गौतमले बालबालिकाको लगानीमा तयार गरिएका सामाग्रीहरुमा विद्यालयको तर्फबाट स्टल व्यवस्थापनमा सहयोग गरिएको बताउनुभयो । 

बालबालिकाहरुको लगानी, व्यवस्थापनमा तयार गरिएका सामाग्रीहरु बिक्रि वापतको रकम समेत विद्यार्थीहरुकै आम्दानी हुनेछ । बालबालिकाहरुको सीप विकास, स्वरोजगारको लागि उत्प्रेरणा र पौराणीक सामाग्रीहरुको उपयोगिता बारे जानकारी दिन विद्यालयले उक्त कार्यक्रम आयोजना गरेको जनाएको छ । 

उक्त प्रदर्शनी बिहान ११ बजेदेखि बेलुका ६ बजेसम्म विद्यालयमा सञ्चालन हुने भएकोले अवलोकनका लागि सरोकारवाला तथा ईच्छुकलाई आमन्त्रण गरिएको स्कुलले जनाएको छ ।