टम्म भरिएको, पर्यटक पर्खिरहेको स्यार्पूताल (फोटो फिचर)

बर्षा लागेसँगै रुकुम पश्चिमको बाँफिकोट गाउँपालिका वडा नम्वर ३ र ५ मा फैलिएको स्यार्पूताल टम्म भरिएको छ । कर्णालीकै प्रमुख पर्यटकियस्थल स्यार्पूताल यतिबेला लोभलाग्दो बनेको छ, तालकाे सुन्दरताले पर्यटक लोभ्याईरहेको छ । 

स्यार्पूताल २.६ वर्गकिलोमिटर क्षेत्रफलमा फैलिएको छ । २०३६ सालको एक तथ्याङक अनुसार तालको गहिराई वर्षातमा २३ मिटर र हिउँदमा १८ मिटरसम्म हुन्छ । तर २०७६ मा प्रकाशित पर्यटन प्रवद्र्धन तथा वातावरण पुस्तिकामा स्यार्पूतालको गहिराई वर्षातमा १३ मिटर र हिउँदमा पाँच मिटर भनेर उल्लेख गरिएको पाईन्छ । 

सिमछहरीबाट दादुरे हुँदै झर्ने निश्चल पानी, स्यार्पूतालसँगै गाँसिएका स्पार्पुगाउँ र दहगाउँले यहाँको आकर्षण बढेको छ । टमक्क भरिएको स्यार्पूबाट दहि जस्तै भएर बग्ने खोला पनि यहाँको अर्को आकर्षण हो । 

बिशेष गरी वर्षायाममा हेर्नलायक हुने यो तालको शोभा यतिबेला हलक्कै बढेको छ ।  स्यार्पूतालको आकार वर्षा र हिउँदमा फरक हुन्छ । आकार मात्र होईन रंग पनि बदल्छ स्यार्पुले । भरिभराउ तालको साउन देखि असोज महिना भरी अवलोकन गर्न सकिन्छ । त्यसपछि तालको आकार विस्तारै घट्दै जान्छ । हिउँदमा पनि ताल निकै रमणिय देखिन्छ । 

बजारको सधैको कोलाहल, हिलो, धुलो र धुँवाको सामना गरिरहेकालाई घुमघामका लागि यो ठाउँ निकै उपयुक्त छ । तालमा बोटिङ गर्नको लागि आधुनिक डुङगाको व्यवस्था छ । विशेषगरी तालबाट काठका डुङगा विस्थापित गरेर आधुनिक डुङगा राखिनु तथा खाना र बस्नका लागि होमस्टेहरु सञ्चालन गरिनुले यहाँ घुम्न आउँनेहरुको संख्यामा समेत बृद्धि भएको छ । 

होमस्टे संचालक हिरालाल केसीले अहिले ताल टम्म भरिएर लोभलाग्दो बनेको र हेर्न आउनेहरुको संख्या बढीरहेको बताउनुभयो । तालको सुन्दरतामा रमाउने, फोटो तथा भिडियो बनाउने, होमस्टेमा अग्र्यानिक खाना, खाजाको स्वाद लिनेहरु अरु भन्दा सार्वजनिक बिदाको दिनमा बढी हुने केसीले जानकारी दिनुभयो । 

पर्यटनकर्मी गोपाल केसीका अनुसार हिमालबाट बगेर आउँने पानी तालमा मिसिने भएका कारण यहाँ स्नान गर्दा स्वास्थ्यका लागि फाइदाजनक रहेको स्थानीयको विश्वास छ । जडिबुटीसहितको पानी तालमा मिसिने भएकोले यसको छुट्टै महत्व रहेको उहाँको भनाई छ । 

स्यार्पूताल पुग्नको लागि रुकुम पश्चिमको जिल्ला सदरमुकाम मुसीकोटबाट करिब तीन घण्टाको पैदल यात्रा लाग्छ भने २० किलोमिटर मोटर बाटो रहेको छ ।