सोती घटनामा  : २४ जनालाई जन्मकैद फैसला, आठ जनालाई सफाई

रुकुम पश्चिम । रुकुम पश्चिमको चौरजहारी नगरपालिका ८ सोतीमा तीन वर्ष अघि ६ जनाको ज्यान जानेगरी भएको हत्याकाण्डको फैसला भएको छ । 
उक्त घटनामा संलग्न भएको भन्दै रुकुम जिल्ला अदालतले २४ जनालाई जन्मकैदको फैसला गरेको छ ।

जिल्ला न्यायाधीस खड्क बहादुर केसीको एकल इजलासले उक्त घटनामा मुद्धा दर्ता भएका ३४ जना मध्य २४ जनालाई जन्मकैदको फैसला गरेको हो । 

पूर्पक्षका लागि थुनामा रहेका २३ जना र तारेकमा रिहा भएका एक जनासमेत गरेर २४ जनालाई जन्मकैदको फैसला गरेको अदालतका सूचना अधिकारी गोविन्द प्रसाद कोईरालाले जानकारी दिनुभयो । 

यसैगरी घटनामा संलग्ग भएको भन्दै तारेकमा रिहा भएकी किशोरी र आमालाई जातिय छुवाछुत तर्फ दुई वर्ष कैद र ५० हजार जरिवाना भएको छ । तारेकमा रहेका अन्य आठ जनालाई उक्त मुद्धामा सफाई दिईएको छ । 

यसैगरी पीडितका परिवारहरुलाई प्रतिवादीका तर्फबाट जनही ४० हजार जरिवाना दामासाहि तरिकाले उपलब्ध गराउने फैसला भएको छ ।