रुकुम पश्चिममा घट्दैछ नागरिकता र राहदानी लिनेको सङख्या

रुकुम पश्चिममा नागरिकता र राहदानी लिने नागरिकको संख्या बर्षेनी घट्दो क्रममा रहेको छ । जिल्ला प्रशासन कार्यालयले पछिल्लो तीन वर्ष यता नागरिकता र राहदानी लिनेको सङख्यामा कमी आएको जनाएको छ । 

जिल्ला प्रशासनबाट सम्पादित कार्यहरुको जानकारी गरानुहुँदै प्रमुख जिल्ला अधिकारी निशानराज गौतमले गत आर्थिक वर्ष ०८२/०८३ मा चार हजार ९६१ नयाँ नागरिकता जारी भएको बताउनुभयो । पछिल्लो तीन वर्षको तुलना गर्दा यो संख्यामा कमी हुँदै आएको छ । प्रशासन कार्यालयका अनुसार अघिल्लो आव ०८१/०८२ मा पाँच हजार ६४८ र आव ०८०/०८१ मा पाँच हजार ८०२ वटा नागरिकता वितरण भएको छ । 

राहदानी लिनेको सङख्यामा समेत कमी आएको छ । गत आव ०८२/०८३ मा दुई हजार ८१९ जनाले राहदानी सेवा लिएका छन् भने आव ०८१/०८२ मा दुई हजार ८९० वटा राहदानी वितरण गरिएको छ  । आव ०८०/०८१ मा तीन हजार ३५८ वटा राहदानी वितरण गरिएको तथ्याङक रहेको छ ।  

प्रशासन कार्यालयका अनुसार नारिकताको प्रतिलिपी लिनेहरुको संख्या पनि अघिल्लो वर्ष भन्दा गत वर्ष कम रहेको छ । गत आव ०८२र०८३ मा चार हजार २२१ वटा नागरिकताको प्रतिलिपी जारी गरिएको छ भने अघिल्लो आवमा चार हजार ३६८ जनाले नागरिकताको प्रतिलिपी लिएका थिए । आव ०८०र०८१ मा भने तीन हजार ५०३ वटा नागरिकताको प्रतिलिपि जारी भएको थियो । 

प्रजिअ गौतमले गत वर्ष चार जनाले नागरिकता त्याग गरेको र तीन जनाको नागरिकता रद्ध गरिएको बताउनुभयो । गत वर्ष १४७ जनाको नाबालक परिचयपत्र वितरण गरिएको छ भने अघिल्लो वर्ष १८१ जनाको नाबालक परिचयपत्र बनाईएको थियो ।

नागरिकता र राहदानी बनाउनेको संख्यामा कमी आउनुको मुख्य कारण खोजिको विषय रहेको छ । प्रजिअ गौतमले एउटा कारण बसाइसराई हुनसक्ने भएतापनि वैदेशिक रोजगारीमा जानेको सङख्यामा कमी आउँदा राहदानी बनाउनेको संख्या घटेको अनुमान गर्नुभयो । 

राष्ट्रिय परिचय पत्र दर्ता बढ्दै

जिल्लामा राष्ट्रिय परिचय पत्र दर्ताको अवस्था भने बढेको छ । आव ०८०र०८१ मा छ हजार ३०४ जनाको राष्ट्रिय परिचय पत्र दर्ता गरिएको थियो भने आव ०८१र०८२ मा १२ हजार ८९७ जनाको विवरण दर्ता गरिएको छ । त्यसैगरी गत आव ०८२र०८३ मा १४ हजार ३७ जनाको राष्ट्रिय परिचय पत्र दर्ता भएको छ ।

पछिल्लो समय बैंक, मतदाता परिचय पत्र तथा अन्य सरकारी कामकाजमा राष्ट्रिय परिचय पत्र अनिवार्य बन्दै गएपछि बनाउनेको सङख्यामा वृद्धि भएको हो । 

प्रशासन कार्यालयले गत आव ०८२र०८३ मा एक करोड ५८ लाख २८ हजार ३५५ रुपियाँ संकलन गरेको छ । न्यायिक दस्तुर, परीक्षा शुल्क, राहदानी शुल्क, हातहतियार इजाजतपत्र दस्तुर, प्रशासनिक दण्ड जरिवाना, जफत र अन्य विभिन्न शिर्षकबाट राजस्व संकलन भएको हो ।