आफ्नै भवनबाट सानीभेरी गाउँपालिका अस्पतालको सेवा

रुकुम पश्चिमको सानीभेरी गाउँपालिका अस्पतालले आफ्नै भवनबाट सेवा प्रवाह गर्न थालेको छ । अस्पतालको नवनिर्मित १५ शैयाको आधुनिक भवन निर्माणपछि नयाँ भवनबाटै सेवा दिन थालिएको हो । 

नवनिर्मित भवनको गाउँपालिका अध्यक्ष बिर्खबहादुर बिष्टले उद्घाटन गर्नुभएको छ । सो अवसरमा अध्यक्ष बिष्टले आधुनिक भवनबाट स्वास्थ्य सेवा सञ्चालन गर्न पाउनु गाउँपालिकाका लागि गौरवको विषय भएको बताउनुभयो ।

उहाँले भवन निर्माणसँगै अब यसबाट गुणस्तरीय, प्रभावकारी र नागरिकमैत्री स्वास्थ्य सेवा प्रवाह गर्नु सबैको साझा जिम्मेवारी र चुनौती रहेको उल्लेख गर्नुभयो । गाउँपालिकाले नागरिकको स्वास्थ्य र शिक्षाको सवाललाई उच्च प्राथमिकताका साथ काम गरिरहेको अध्यक्ष बिष्टले बताउनुभयो । 

भवन शिलान्यस भएको करिब साढे पाँच वर्षपछि निर्माण पुरा भएको हो । २०७७ साल फागुन महिनामा तत्कालीन गाउँपालिका अध्यक्ष नरबहादुर पुनले शिलान्यास गर्नुभएको उक्त भवन करिव १८ करोड रुपियाँको लागतमा निर्माण भएको हो । भवन उद्घाटनसँगै विधिवत रुपमा सञ्चालनमा आएको गाउँपालिकाका प्रमुख प्रशासकीय अधिकृत नरवीर खड्काले जानकारी दिनुभयो । 

यस अवसरमा स्वास्थ्य सेवामा उत्कृष्ट योगदान पु¥याउने स्वास्थ्यकर्मीलाई सम्मान समेत गरिएको छ । प्रसूति सेवामा उल्लेखनीय योगदान पु¥याएको भन्दै अस्पतालमा कार्यरत अनमी मनकला ओलीलाई सम्मान गरिएको हो । उहाँले एक वर्षको अवधिमा ७९ वटा सफल प्रसूति सेवा प्रदान गर्नुभएको अस्पतालले जनाएको छ । सोही मूल्याङकनका आधारमा नगद २० हजार रुपियाँ र सम्मानपत्रसहित उहाँलाई सम्मान गरिएको हो ।

त्यसैगरी प्रसूति सेवामा सहयोगीको रुपमा महत्वपूर्ण भूमिका निर्वाह गरेको भन्दै प्रविक विकलाई नगद पाँच हजार रुपियाँ र सम्मानपत्रले सम्मान गरिएको छ । कार्यक्रममा अस्पताल निर्माणका लागि निःस्वार्थ रुपमा जग्गा उपलब्ध गराउने जग्गादाताहरूलाई पनि सम्मान गरिएको प्रमुख प्रशासकीय  अधिकृत खड्काले जनाउनुभयो । 

भवन उद्घाटन कार्यक्रममा गाउँपालिकाका पूर्व अध्यक्ष नरबहादुर पुन, पूर्व उपाध्यक्ष इन्दिरा ओली, स्थानीय जनप्रतिनिधिहरु, राजनीतिक दलका प्रतिनिधि, कर्मचारी, स्वास्थ्यकर्मी, सुरक्षाकर्मी तथा सर्वसाधारणको सहभागीता रहेको थियो । सहभागीहरुले आधुनकि र नयाँ भवन सञ्चालनसँगै सानीभेरी गाउँपालिकाका नागरिकले अझ व्यवस्थित र गुणस्तरीय स्वास्थ्य सेवा प्राप्त गर्ने विश्वास व्यक्त गर्नुभएको छ ।