प्रभात माविमा एकसाथ नवनिर्मित भवन, तालिम र मञ्च उद्घाटन

रुकुम पश्चिमको मुसिकोट नगरपालिका –१४ दोपाई स्थित श्री प्रभात माध्यमिक  विद्यालयको नवनिर्मित भवन, तालिम हल तथा मञ्च एकै साथ उद्घाटन गरिएको छ । मुसिकोट नगरपालिकाका प्रमुख महेन्द्र केसीले शनिबार नवनिर्मित विद्यालय भवन, मञ्च र तालिम हलको उद्घाटन गर्नुभएको हो ।

उद्घाटन समारोहलाई सम्बोधन गर्नुहुँदै नगर प्रमुख केसीले शिक्षा क्षेत्रको विकास नै समृद्ध समाज निर्माणको आधार भएको बताउनुभयो। उहाँले गुणस्तरीय शिक्षाका लागि दक्ष शिक्षकसँगै व्यवस्थित भौतिक पूर्वाधार आवश्यक रहने उल्लेख गर्दै विद्यालयमा निर्माण भएको नयाँ भवनले विद्यार्थीहरूलाई सुरक्षित, व्यवस्थित र सहज वातावरणमा अध्ययन गर्ने अवसर प्रदान गर्ने विश्वास व्यक्त गर्नुभयो। स्थानीय सरकार शिक्षाको गुणस्तर सुधार, विद्यालय पूर्वाधार विकास तथा विद्यार्थीमैत्री वातावरण निर्माणमा निरन्तर प्रतिबद्ध रहेको उहाँको भनाइ थियो।

सोहि दिन विद्यालयको अभिभावक भेला समेत सम्पन्न भएको छ । विद्यालय व्यवस्थापन समितिका अध्यक्ष लाल बहादुर रोकाको अध्यक्षतामा कार्यक्रम सम्पन्न भएो हो । 

उक्त कार्यक्रममा नेपाली काँग्रेस जिल्ला कार्यसमिति रुकुम पश्चिमका कोषाध्यक्ष मोहविर खड्का , सहसचिव यज्ञ बिष्ट, मुसिकोट नगरपालिका प्रवक्ता एंव मुसिकोट नगरपालिका वडा नम्वर ५ का वडा अध्यक्ष समिर जङ मल्ल , मुसिकोट नगरपालिका वडा नम्वर १४ का वडा अध्यक्ष गोवर्धन ओली, मुसिकोट नगरपालिकाका शिक्षा शाखा प्रमुख नरेन्द्र ओली, लगायतको आतिथ्यता रहेको थियो । 

कार्यक्रममा मुसिकोट नगरपालिका वडा नम्वर १३ का वडा सदस्य वीर बहादुर रोका, शिक्षक अभिभावक संघका अध्यक्ष डिल्ली बहादुर रोका, विद्यालय व्यवस्थापन समितिका पूर्व अध्यक्ष गोविन्द रोका  र गोपाल खड्का लगायत विभिन्न राजनीतिक दलका नेता तथा प्रतिनिधिहरू, शिक्षक, अभिभावक, विद्यार्थी र स्थानीयवासीहरूको उपस्थिति रहेको थियो।

कार्यक्रमको सञ्चालन सहायक प्रधानाध्यापक शसिराम घर्ती ज्यूले गर्नुभएको थियो।