सानीभेरीमा भेटियो बम, सेनाद्वारा डिस्फोज

रुकुम पश्चिमको सानीभेरी गाउँपालिका वडा नम्बर १ बल्देबिसौना सकेट बम फेला परेको छ । बुधबार बिहान बल्देबिसौनाको जङ्गलमा रहेको गोरेटो बाटो छेउमा सकेट बम फेला परेको प्रहरीले जनाएको छ । 

जिल्ला प्रहरी कार्यालयका सूचना अधिकारी प्रहरी निरीक्षक झविन्द्र परियारका अनुसार उक्त बम डिस्फोज गरिएको छ । बम भेटिएपछि स्थानीयले प्रहरीलाई खबर गरेका थिए । 

त्यस लगत्तै जिल्ला प्रहरी कार्यालयबाट प्रहरी निरीक्षक हेमन्त गिरी र प्रहरी चौकी पुर्तिमकाँडाबाट प्रहरी सहायक निरीक्षक युवराज पाण्डेको नेतृत्वमा प्रहरी टोली घटनास्थल पुगेको थियो ।

त्यस लगत्तै नेपाली सेनाको चण्डी दल गण सल्लेबाट सेनानी सुबनबहादुर कार्कीको नेतृत्वमा गएको बम डिस्फोजल टोलीले  उक्त बम डिस्पोज गरेको प्रहरी निरीक्षक परियारले जानकारी दिनुभयो । 

उक्त बम कहिले कस्ले राखेको हो भन्ने बिषयमा अनुसन्धान भईरहेको प्रहरीको भनाई छ । स्थानीयले विगतको सशस्त्र द्वन्द्वका क्रममा छुटेको हुन सक्ने आकलन गरेका छन् ।