चौरजहारीमा यसरी निकालियाे 'डिप बोरिङ' गरेर ५० मिटर गहिराईबाट पानी (भिडियोसहित)

रुकुम पश्चिमको चौरजहारीमा डिप बोरिङमार्फत पानी निकाल्ने प्रयास सफल भएको छ। यससंगै नयाँ शहर उन्मुख चौरजहारीमा लामो समयदेखिको खानेपानी समस्या समाधान हुने भएको छ ।

चौरजहारी सुख्खा खानेपानी तथा सरसफाइ उपभोक्ता संस्थाको पहलमा वडा नम्बर ३ को दमारमा गरिएको डिप बोरिङको परीक्षण सफल भएको हो।
संस्थाका अध्यक्ष तेज बहादुर बटालाका अनुसार दुई स्थानमा गरेको डिप बोरिङ परीक्षणका क्रममा जमिनको करिब ५० मिटर गहिराइबाट स्वच्छ पानी निकालिएको हो ।

अब करिब तीन दिन भित्र बोरिङ गरिएको स्थानको पानीलाई फिल्टर ट्यांकी हुँदै मुख्य खानेपानी ट्यांकीमा संकलन गरेर उपभोक्तालाई वितरण गर्ने तयारी भईरहेको अध्यक्ष बटालाले जानकारी दिनुभयो । उहाँका अनुसार बोरिङ गरिएको पानी प्रतिघण्टा ३२ हजार लिटरका दरले आउने गरेको छ । 

हाल संस्थामार्फत चौरजहारी नगरपालिका–१, २ र ३ नम्बर वडाका करिब २१ सयभन्दा बढी धारामार्फत खानेपानी वितरण हुँदै आएको छ। यसअघि दमार क्षेत्रमा तीन सय घनमिटर क्षमताको खानेपानी ट्यांकी निर्माण गरी खानेपानी वितरण हुँदै आएको छ ।

संस्थाका व्यवस्थापक बसन्त भण्डारीले पछिल्ला वर्षहरूमा भेरी नदीको बहाव घट्दै जाने तथा विपद्का कारण मोटर तथा जेनेरेटरमा समस्या आएर नियमित खानेपानी आपूर्तिमा कठिनाइ हुने गरेको छ । अब भूमिगत स्रोतबाट पर्याप्त पानी उपलब्ध भएपछि चौरजहारीवासीले लामो समयदेखि झेल्दै आएको खानेपानी अभावको समस्या उल्लेखनीय रूपमा समाधान हुने अपेक्षा गरिएको उहाँले बताउनुभयो ।

ध्रुवतारा डिप बोरिङ कन्स्ट्रक्सन प्रालि नेपालगञ्जको प्राविधिक टोलीले डिप बोरिङ गरेर पानी निकाल्ने कार्य पूरा गरेको हो ।

भिडियाे :