क्याम्पस स्थापना दिवसको अवसरमा जग्गादाता र संस्थापकलाई सम्मान

रुकुम पश्चिमको चौरजहारी नगरपालिका -११ मा रहेको जहारी क्याम्पसले स्थापनाको १६औं दिवस विभिन्न कार्यक्रमका साथ मनाएको छ । 
आईतबार क्याम्पसमा औपचारिक कार्यक्रमको आयोजना गरेर स्थापना दिवस मनाएको क्याम्पसले जनाएको छ । क्याम्पस प्रमुख शेरबहादुर डाँगीका अनुसार प्रतिनिधि सभा सदस्य गोपाल शर्माको प्रमुख आतिथ्यतामा भएको कार्यक्रममा जग्गादाताहरु, क्याम्पसको संस्थापक कार्य समिति, संस्थापक क्याम्पस प्रमुखलाई सम्मान गरिएको छ भने क्याम्पस परिसरमा वृक्षारोपण गरिएको छ । 

जहारी क्याम्पसलाई जग्गा दान गर्ने जना दश जना जग्गा दाताहरूलाई दोसल्ला ओढाएर र सम्मान पत्र प्रदान गरेर सम्मान गरिएको हो ।

सम्मानित हुनुहुने जग्गादाताहरुमा चौरजहारी नगरपालिका -१२ निवासी लिलु जैसी, सोहि नगरपालिका वडा नम्वर १० का दयाराम खड्का, भद्रकुमारी बुढा, लिलावती बुढा, मनबहादुर बुढा, निर्मल बुढा, हर्कबहादुर ओली, ईन्द्रबहादुर ओली, भिमबहादुर ओली र जुठे कटवाल रहनुभएको छ । उहाँहरुले क्याम्पसलाई निशुल्क जग्गा उपलब्ध गराउनुभएको हो । 

त्यसैगरी क्याम्पसका संस्थापक कार्यसमिति र संस्थापक क्याम्पस प्रमुखहरूलाई पनि दोसल्ला र प्रसंशा पत्र द्वारा सम्मान सम्मान गरिएको छ । सोहि अवसरमा डिभिजन वन कार्यालयको सहयोग तथा सहजिकरणमा क्याम्पस परिसर विभिन्न प्रजातिका ६० वटा विरुवा समेत रोपिएको छ । 

प्रतिनिभि सभा सदस्य गोपाल शर्माको प्रमुख आतिथ्यता र क्याम्पस सञ्चालक समितिका अध्यक्ष सुन्दर शर्माको अध्यक्षतामा भएको स्थापना दिवस बिशेष कार्यक्रममा विभिन्न व्यक्तित्वहरुको सहभागिता रहेको थियो ।