गस्तीमा गएका प्रहरी जवान घाइते, हेलिकोप्टरमार्फत उद्धार

डोल्पामा गस्तीमा गएका एक प्रहरी जवान घाईते हुुनुभएको छ ।

डोल्पाको शे-फोक्सुण्डो गाउँपालिका -३ स्थित प्रहरी चौकी साल्दाङमा कार्यरत प्रहरी जवान ३१ वर्षीय ललित सुनार गस्तीमा गएको बेला घाईते हुनुभएको हो ।

जिल्ला प्रहरी कार्यालय डोल्पाका प्रहरी नायब उपरीक्षक (डिएसपी) अनिल राज गिरीका अनुसार शुक्रबार बेलुका गस्ती जाने क्रममा एक्कासी ढुङ्गामा चिप्लिएर लगेर उहाँ घाईते हुुनुभएको हो । उहाँको खुट्टाको घुँडामुनीको भाग फ्याक्चर भएको थियो । 

घाईते पश्चात स्वास्थ्य चौकी साल्दाङमा भर्ना गरिएका प्रहरी जवान सुनारलाई थप उपचारका लागि आज दिउँसो हेलिकोप्टरमार्फत उद्धार गरेर सुर्खेत लिईएको छ । डिएसपी गिरीका अनुसार घाईते प्रहरी जवान सुनारलाई नेपाली सेनाको एनए–०६१ नम्वरको हेलिकोप्टरमार्फत सुर्खेत लिईएको हो । 

घाईते प्रहरी जवान दैलेखको भगवतीमाई गाउँपालिका -१ बगनाथ निवासी हुनुहुन्छ ।