'मजाक' भन्दै फेसबुकमा साम्प्रदायिक द्वेष फैलाउने तीन युवा रुकुममा पक्राऊ

जिल्ला प्रहरी कार्यालय रुकुम पश्चिमले तीन जना युवालाई पक्राउ गरेको छ । प्रहरीले सामाजिक सञ्जाल फेसबुकमा साम्प्रदायिक द्वेष फैलाएको र दुर्व्यवहार गरेको आरोपमा तीन जनालाई पक्राउ गरेको जनाएको छ ।

जिल्ला प्रहरी कार्यालय रुकुम पश्चिमका प्रहरी नायब उपरीक्षक बेदबहादुर पौडेलका अनुसार पक्राउ पर्नेहरुमा जिल्लाको बाँफिकोट गाउँपालिका–२ निवासी २८ वर्षीय डिल्लीबहादुर ओली, सोही स्थानका ३१ वर्षीय राजन के.सी. तथा हाल मुसिकोट नगरपालिका–१ सल्लेमा प्यारेटी उद्योग सञ्चालन गर्दै आएका कपिलवस्तुको कृष्णनगर नगरपालिका–४ स्थायी घर भएका ३१ वर्षीय रघुबिर कोरी रहेका छन्।

उनीहरुले "Jiban oli" नामक पेजमार्फत मधेसी मूलका व्यक्ति जस्तो देखिने व्यक्तिलाई दुर्व्यवहार गरिएको भिडियो सामग्री तयार गरी सामाजिक सञ्जालमा सार्वजनिक गर्दै साम्प्रदायिक घृणा तथा द्वेष फैलाउने र जातजाति तथा समुदायबीचको सामाजिक सद्भाव खलबल्याउने गतिविधिमा संलग्न रहेको प्रहरीले जनाएको छ ।

प्रहरीले उनीहरूलाई आज शुक्रवार बेलुका मुसिकोट नगरपालिका–३ माछिमीबाट नियन्त्रणमा लिएको हो। प्रहरीका अनुसार उनीहरूले सामाजिक सञ्जालमार्फत साम्प्रदायिक घृणा वा द्वेष फैलाउने तथा जातीय एवं सामुदायिक सद्भावमा असर पुग्ने खालको सामग्री प्रसारण गरेको आरोपमा नियन्त्रणमा लिइएको हो।

घटनाबारे थप अनुसन्धान भइरहेको जिल्ला प्रहरी कार्यालय रुकुम पश्चिमले जनाएको छ।