रुकुम पश्चिमका ७०१ जना भूकम्प प्रभावितको आवास निर्माणका लागि पहिलो किस्ता निकाशा

जाजरकोटको रामीडाँडा केन्द्रबिन्दु भएर २०८० कार्तिक १७ गते गएको भूकम्पले रुकुमपश्चिममा क्षति भएका निजि आवास पुनर्निर्माणका लागि पहिलो किस्ता वापतको रकम निकाशा गरिएको छ । जिल्ला प्रशासन कार्यालयका अनुसार प्रभावित लाभग्राही मध्य ७०१ जनाको आवास निर्माणका लागि रकम निकाशा भएको हो । 

प्रमुख जिल्ला अधिकारी निशानराज गौतमले ७६६ जनाको लागि पहिलो किस्ताको रकम माग गरिएकोमा ७०१ जनाको मात्र रकम आएकोले सम्बन्धित पालिकामा निकाशा पठाईसकिएको जानकारी दिनुभयो । उहाँका अनुसार गत साउन २६ गते सम्पन्न जिल्ला विपद् व्यवस्थापन समितिको बैठकको निर्णय अनुसार मुसीकोट नगरपालिका, चौरजहारी नगरपालिका, त्रिवेणी गाउँपालिका र सानीभेरी गाउँपालिकाका ७६६ जना लाभग्राहीको आवास निर्माणको लागि पहिलो किस्ता माग गरिएको थियो । 

राष्ट्रिय विपद् जोखिम न्यूनकिरण तथा व्यवस्थापन प्राधिकरणबाट भने ७०१ जनाको लागि ५० हजारको दरले तीन करोड ५० लाख ५० हजार रकम आएको थियो । उक्त रकम सम्बन्धित पालिकाको स्थानीय विपद् व्यवस्थापन समितिको खातामा निकाशा पठाईसकिएको प्रजिअ गौतमले जनाउनुभयो । उहाँका अनुसार भूकम्प प्रभावित निजि आवास पुनर्निर्माण कार्यविधि, २०८० (संशोधनसहित) बमोजिम सम्झौता गरी आवश्यक कागजात तथा प्रक्रिया पुरा गरेका लाभग्राहीहरुको लागि आवास निर्माणको अनुदान माग गरिएको थियो । 

पुनर्निर्माणका लागि प्रति लाभग्राही ५० हजारका दरले मुसीकोट नगरपालिकाका ६५ जना, चौरजहारी नगरपालिकाका १६२, त्रिवेणी गाउँपालिकाका ३०२ र सानीभेरी गाउँपालिकाका २३७ जना लाभग्राहीको लागि पहिलो किस्ता माग गरिएको थियो । तर मुसीकोटका ६५ लाभग्राहीहरुको विवरणमा केहि अपुग भएपछि अन्य पालिकाका लाभग्राहीहरुको लागि मात्र रकम आएको थियो । 

जिल्ला प्रशासन कार्यालयको तथ्याङक अनुसार रुकुमपश्चिममा ३२ हजार ९९६ घरधुरी लाभग्राही कायम भएका थिए । जसमध्य ३० हजार ८५० जनाको क्षति विस्तृत विवरण प्राधिकरणले तयार गरेको छ । त्यसमध्य कार्यविधि अनुसार प्रक्रिया पुगेकाहरुको आवास निर्माणको लागि किस्ता माग सुरु भएको छ ।