सल्ले जाने बाटोमै एक महिला मृत फेला

रुकुम पश्चिमको मुसिकोट नगरपालिका १ सल्लेमा एक महिलाको शव भेटिएको छ । आज (आईतबार) बिहान सल्ले जाने बाटोमा मृत अवस्थामा महिलामा शव फेला परेको हो । 

जिल्ला प्रहरी कार्यालयका प्रमुख प्रहरी नायब उपरीक्षक (डिएसपी) बेद बहादुर पौडेलका अनुसार उक्त शव बाँफिकोट गाउँपालिका -१० झुला घर भई मुसिकोट नगरपालिका -५ थर्पुस्थित माईती घरमा बस्दै आएकी ६२ वर्षीया कमला खत्रीको रहेको छ । 

मृतकको साथमा नागरिकता र सामाजिक सुरक्षा भत्ता बुझ्ने कागज रहेकोले शवको पहिचान गरेर आफन्तलाई खबर गरिएको डिएसपी पौडेलले जानकारी दिनुभयो । खत्री करिब पाँच वर्ष देखि थर्पुस्थित माईतीमै बस्दै आएको बताईएको छ । 

थर्पुबाट जिल्ला अस्पताल सल्लेतर्फ जाने बाटोमा खत्रीको शव भेटिएको हो । प्रहरीले अस्पताल जाने क्रममा बाटोमै खत्रीको निधन भएको हुन सक्ने प्रारम्भिक अनुमान गरेको छ । घटनाको थप अनुसन्धान सुरु गरिएको बताईएको छ । 

खत्रीको शव जिल्ला अस्पताल सल्लेमा राखिएको छ । आफन्तहरुलाई खबर गरिएको छ भने पोष्टमार्टम रिपोर्टपछि मृत्युको थप कारण खुल्ने प्रहरीको भनाई रहेको छ ।