छेडागाडमा बाल–केन्द्रित बजेट तथा योजना तर्जुमा सम्बन्धी बृहत् अन्तरसंवाद

जाजरकोटको छेडागाडमा बाल–केन्द्रित बजेट तथा योजना तर्जुमा सम्बन्धी नगर स्तरीय अन्तरसंवाद कार्यक्रम सम्पन्न भएको छ । 

छेडागाड नगरपालिकाको आयोजना तथा सेभ द चिल्ड्रेन र पाँचतारा युवा संरक्षक मञ्च, जाजरकोटको प्राविधिक सहयोगमा बुधबार अन्तरसंवाद कार्यक्रम सम्पन्न भएको हो । 

आगामी आर्थिक वर्षको नीति, कार्यक्रम तथा बजेट वक्तव्यको पूर्वसन्ध्यामा 'बालबालिकामा लगानी अभिवृद्धिका लागि बाल केन्द्रित बजेट तथा कार्यक्रम निर्माण तथा प्रभावकारी कार्यान्वयन' भन्ने मूल नाराका साथ छेडागाड नगरपालिका–१२ मा उक्त कार्यक्रमको आयोजना गरिएको हो । 

बाल–केन्द्रित योजना निर्माण र उत्तरदायित्व बहन, सामाजिक कुप्रथा विरुद्ध साझा ऐक्यबद्धता र बहु सरोकारवाला निकाय बिच साझेदारी अभिबृद्धि गर्ने उद्धेश्यका साथ यो कार्यक्रम आयोजना गरिएको पाँचतारा युवा संरक्षक मञ्चका परियोजना व्यवस्थापक लोकमणी गिरीले जानकारी दिनुभयो ।

उहाँका अनुसार कार्यक्रममा नगरपालिका भित्रका बालबालिका तथा युवाहरूका प्रमुख सवालहरूमाथि सरोकारवालाहरूबीच साझा बुझाइ कायम गरिएको छ । यसका साथै समुदायमा विद्यमान बालबालिकाका समस्याहरू उजागर गर्दै समाधानका लागि स्थानीय सरकार र सम्बद्ध निकायहरूको ध्यानाकर्षण समेत गराइएको छ । 

छेडागाड नगरपालिकाका प्रमुख रत्न बहादुर खड्काको अध्यक्षतामा सम्पन्न उक्त कार्यक्रममा नगर उपप्रमुख चन्द्रबहादुर थापा, प्रमुख प्रशासकीय अधिकृत शशिकुमार लम्साल, विभिन्न वडाका अध्यक्षहरू, विषयगत कार्यालयका प्रमुखहरू, सुरक्षा निकायका प्रतिनिधि, नागरिक समाजका संयोजक तथा पदाधिकारीहरू, विभिन्न सङ्घसंस्थाका प्रमुख एवं नगर बाल सञ्जालका प्रतिनिधिहरूको व्यापक सहभागिता रहेको थियो । 

कार्यक्रमको प्राविधिक सत्रमा सहयात्रा परियोजनाका संयोजक कुबेर केसीले कार्यक्रमको उद्देश्य, आवश्यकता र अन्तरसंवादको रूपरेखामाथि विस्तृत प्रस्तुतीकरण गर्नुभएको थियो । त्यस्तै, पूर्व बाल तथा युवा अभियन्ता एवं पत्रकार जयराम केसीले कार्यक्रमको सहजकीकरण गर्नुभएको थियो । 

खुला छलफल सत्रमा सहभागीहरूका तर्फबाट नागरिक समाज, बालबालिका तथा युवा समूहका प्रतिनिधिहरूले आफ्ना जिज्ञासा, समस्या र रचनात्मक सुझावहरू प्रस्तुत गरेका थिए ।

उठाइएका सवालहरूमाथि समीक्षा गर्दै नगर प्रमुख, उपप्रमुख र प्रमुख प्रशासकीय अधिकृतसहितका जवाफदेही वक्ताहरूले आगामी बजेट, नीति तथा कार्यक्रममा बाल अधिकार, संरक्षण र बालमैत्री स्थानीय शासन का सूचकहरूलाई रणनीतिक प्राथमिकताका साथ समेट्ने र आवश्यक बजेट विनियोजन गर्ने प्रतिबद्धता व्यक्त गर्नुभएको छ । 

आगामी बजेटले यहाँका बालबालिका, किशोर किशोरी र सीमान्तकृत समुदायको सवाललाई पूर्ण रूपमा न्याय गर्नेमा सहयात्रा परियोजना र सम्बद्ध सरोकारवालाहरूले विश्वास व्यक्त गरेका छन्