एक्सेस परियोजनामार्फत समावेशी शिक्षामा काम गर्ने नागरिक समाज संस्थाको क्षमता विकास गरिदैं 

सबैका लागि शिक्षाको सुनिश्चिततामा नागरिक समाजको भूमिकालाई तिब्र बनाउन कर्णालीको जाजरकोट र सल्यान जिल्लामा शिक्षा क्षेत्रमा कार्यरत नागरिक समाज संस्थाको क्षमता विकास कार्यशाला सम्पन्न गरिएको छ । 

शिक्षा क्षेत्रमा पहुँच, समावेशीता र गुणस्तर अभिबृद्धि गर्न सञ्चालित एक्सेस परियोजनाले दुई जिल्लाका नौ वटा संस्थालाई १४ वटा अनलाईनमार्फत र दुई दिन भौतिक उपस्थितिमा तालिम प्रदान गरेको हो ।

युरोपियन युनियनको सहयोग, पिपुल इन निडको नेतृत्वमा एकान्टेबिलिटी ल्याब, नेपाल अपाङग महिला संघ र शिक्षाका लागि राष्ट्रिय अभियानद्वारा सञ्चालित एक्सेस परियोजना कर्णाली, सुदुरपश्चिम र मधेस प्रदेशमा सञ्चालनमा छ । एकान्टेबिलिटी ल्याबका कार्यक्रम प्रबन्धक शुभेच्छा चापागाईंका अनुसार परियोजनामा आवद्ध जाजरकोटका पाँच र सल्यानका चार वटा संस्थाका पदाधिकारी तथा कर्मचारीहरुलाई तालिम प्रदान गरिएको हो । 

यी संस्थाहरुको क्षमता अभिबृद्धि गरी उनीहरुलाई स्थानीय तह तथा विद्यालयस्तरमा समतामुलक र समावेशी शिक्षा नीति, अभ्यास तथा प्रणालीहरुको प्रभावकारी वकालत, प्रवद्र्धन र कार्यान्वयनमा योगदान गर्न सक्षम बनाउने उद्धेश्यले कार्यक्रम आयोजना गरिएको परियोजना प्रबन्धक चापागाईंले जानकारी दिनुभयो । 

कार्यक्रम समापन समारोहमा सामाजिक विकास मन्त्रालयका शिक्षा महाशाखाका प्रमुख सुवर्ण कुमार खड्काले शिक्षा क्षेत्र सरकारको प्राथमिकताको बिषय भएकोले एक्सेस परियोजनासँग कर्णाली सरकारको आवश्यक सहकार्य र समन्वय भईरहेको बताउनुभयो । उहाँले जहाँ सरकार जान सक्दैन त्यहाँ परियोजनाहरु जान्छन् भन्ने मान्यता अनुसार विकास साझेदार निकायहरुसँग कार्य भईरहेको उल्लेख गर्नुभयो ।

एक्सेस परियोजनामार्फत एकिकृत रुपमा अगाडी बढ्नलाई छलफल र सहकार्य भईरहेको महाशाखा प्रमुख खड्काले बताउनुभयो । खड्काले तालिममा सहभागी संस्थाहरुले अब आफै प्रस्ताव तयार गरेर सोहिअनुसार काम पाउने र कार्यान्वयन गर्न सक्ने अवस्थामा पुगेको विश्वास जागेको बताउनुभयो । 

कार्यक्रममा पिपुल इन निडका प्रवन्धक अनुरोध साहले स्थानीय सरकार र नागरिक समाज संस्थाहरुको प्राविधिक र संस्थागत क्षमता अभिबृद्धि तथा प्रणाली सुदृढीकण गरेर सबैलाई शिक्षाको पहुँचमा ल्याउन एक्सेसले कार्य गरिरहेको जानकारी दिनुभयो । उहाँले सीमान्तकृत तथा बञ्चित बालिका, अपाङ्गता भएका बालबालिका तथा अन्य बहिष्कृत समुदायहरुलाई सुरक्षित, सहयोगी र समावेशी वातावणमा गुणस्तरीय शिक्षामा समान पहँुच सुनिश्चित गर्ने उद्धेश्यका साथ एक्सेस परियोजनाले कार्य गरिरहेको जनाउनुभयो । 

तालिममा सहभागी पहाडी क्षेत्र विकास अभियान जाजरकोटका सदस्य मेमा शाहले विभिन्न बिषयवस्तुहरुमार्फत नागरिक समाज संस्थाहरु बिचमा अनुभव तथा सिकाइ र असल अभ्यासहरु आदान प्रदान भएको बताउनुभयो । उहाँले शिक्षा क्षेत्रमा काम गर्ने संस्थाहरुको ज्ञान, सीप र क्षमता विकास गर्न तालिम महत्वपूर्ण भएको बताउनुभयो ।

सल्यानको कल्याणकारी अपाङ्ग संघका अध्यक्ष कृष्णबहादुर बुढाले अनलाईन र भौतिक उपस्थितिमा भएका विभिन्न तालिम पश्चात समावेशी शिक्षाका सवालहरुमा स्थानीय सरकार, विद्यालय तथा सरोकारवालासँग प्रभावकारी पैरवी र सहकार्यका अवसरहरु पहिचान गर्न सक्ने गरी क्षमता विकास भएको बताउनुभयो । 

तालिममा नागरिक समाज संस्थामा आवश्यक पर्ने नीति तथा रणनीतिहरु, समावेशी शिक्षा विधि र अवधारणा, बालिका तथा समावेशी शिक्षा सञ्जाल, समावेशी शिक्षाका मूल्य मान्यताहरु, समावेशी शिक्षा क्षेत्रका चुनौती र अवसरहरु, बजेट र श्रोत परिचालन, नागरिक समाज संस्थाले तयार पार्ने प्रस्तावना, प्रतिवेदन र कार्ययोजना, विद्यालय शिक्षा क्षेत्र योजना कार्यान्वयनमा नागरिक समाज संस्थाको भुमिका, एक्सेस परियोजनाले नागरिक समाज संस्थालाई प्रदान गर्ने अनुदान रकम लगायतका बिषयमा सहजीकरण गरिएको थियो ।

तालिमको सहजीकरण पीपुल इन निडका अनुरोध शाह, नितिन नरेन सिंह, कर्णाली प्रदेश संयोजक मञ्जु लोहनी, एकान्टेबिलिटी ल्याबका शुभेच्छा चापागाई, स्वष्तिका बस्नेत, नेपाल अपाङग महिला संघका गंगा देवकोटा लगायतले गर्नुभएको थियो ।