सानीभेरीमा शैक्षिक गुणस्तर सुधारका लागि प्रधानाध्यापकसँग कार्यसम्पादन सम्झौता

रुकुम पश्चिमको सानीभेरी गाउँपालिकाले गाउँपालिका भित्र रहेका सामुदायिक विद्यालयका प्रधानाध्यापकहरुसँग कार्यसम्पादन सम्झौता गरेको छ । विद्यालयको शैक्षिक गुणस्तर सुधारका लागि सम्झौता गरिएको गाउँपालिकाले जनाएको छ । 

गाउँपालिकाका प्रमुख प्रशासकिय अधिकृत नरवीर खड्काका अनुसार सामुदायिक विद्यालयका प्रधानाध्यापकहरुको नियमति बैठकका क्रममा भएको निर्णय अनुसार सम्झौता गरिएको हो ।

गाउँपालिकाले विभिन्न ४२ वटा सामुदायिक विद्यालयका प्रधानाध्यापकहरुसँग ४७ बुँदे कार्यसम्पादन सम्झौता गरेको प्रमुख प्रशासकिय अधिकृत खड्काले जानकारी दिनुभयो । उहाँले शैक्षिक सत्र २०८३ को प्रभावकारी सञ्चालन, व्यवस्थापन तथा शैक्षिक गुणस्तर अभिवृद्धिका लागि विद्यालयसँग कार्यसम्पादन सम्झौता गरिएको बताउनुभयो । 

शिक्षा शाखा प्रमुख भूपालसिं बिष्ट र सम्बन्धित विद्यालयका प्रधानाध्यापकहरु बिच सम्झौता भएको हो । सम्झौतामा विद्यालय व्यवस्थापन, शिक्षण सिकाइ सुधार, विद्यार्थी भर्ना अभियान, पाठ्यपुस्तक वितरण, विद्यालय सुधार योजना निर्माण, शिक्षक कार्यसम्पादन मूल्याङ्कन, कक्षा अवलोकन, अभिभावकसँग नियमित अन्तरक्रिया, सामाजिक परीक्षण तथा वित्तीय सुशासन लगायतका ४७ बुँदे सूचक समेटिएका छन् ।

सम्झौताअनुसार विद्यालयहरुले सिकाइ उपलब्धि सुधार, विद्यार्थीको नियमित उपस्थिति, विद्यालय छाड्ने तथा कक्षा दोहो¥याउने दर न्यूनीकरण, सूचना तथा सञ्चार प्रविधिको प्रयोग, विद्युतीय हाजिरी कार्यान्वयन, हरित तथा बालमैत्री विद्यालय अवधारणाको कार्यान्वयन र विद्यालय सुशासनलाई प्राथमिकतामा राख्नुपर्नेछ ।

यसैगरी विद्यालयमा भएका नवप्रवर्तन र असल अभ्यासहरूको आदानप्रदान, शैक्षिक सुधारका चुनौती तथा समाधानका उपायबारे प्रधानाध्यापकहरु बिचमा छलफल गरिएको छ । गाउँपालिकाले कार्यसम्पादन सम्झौताको नियमित अनुगमन तथा मूल्याङ्कन गरी त्यसको आधारमा विद्यालयलाई प्रोत्साहन, पुरस्कार तथा सेवा सुविधा वितरण गरिने जनाएको छ । 

गाउँपालिका अध्यक्ष बिर्खबहादुर विष्टले सामुदायिक विद्यालयको शैक्षिक गुणस्तर सुधार गाउँपालिकाको प्रमुख प्राथमिकता रहेको बताउनुभयो । उहाँले कार्यसम्पादन सम्झौताका सबै सूचकहरू प्रभावकारी रुपमा कार्यान्वयन गर्न आग्रह समेत गर्नुभयो ।

उहाँले विद्यार्थीको सिकाइ उपलब्धि वृद्धि, अनुशासित विद्यालय व्यवस्थापन र समुदायको सहभागितामार्फत सानीभेरीको शिक्षा क्षेत्रलाई नमूना बनाउने लक्ष्य रहेको उल्लेख गर्नुभयो । गाउँपालिकाले गत वर्ष पनि प्रधानाध्यापकहरसँग कार्यसम्पादन सम्झौता गरेर शैक्षिक गविविधिहरु सञ्चालन गरेको थियो ।