रुकुम पूर्वमा पौडेल वंश महासंघको जिल्ला शाखा विस्तार

रुकुम पूर्वमा पौडेल वंशका व्यक्तिहरूलाई एकताबद्ध गर्दै वंशावली संरक्षण, कुलपूजा विधिको एकरूपता कायम गर्ने तथा छरिएर बसेका परिवारलाई आफ्ना पुर्खा र वंशपरम्परासँग जोड्ने उद्देश्यले पहिलो पटक पौडेल वंशको जिल्ला स्तरीय भेला सम्पन्न भएको छ।

रुकुमकोटमा सम्पन्न उक्त भेलाको अध्यक्षता ७९ वर्षीय ज्येष्ठ नागरिक जगतबहादुर खत्री पौडेलले गर्नुभएको थियो ।  कार्यक्रममा पौडेल वंश महासंघ नेपालका केन्द्रीय सदस्य हरिहर पौडेल प्रमुख अतिथि तथा केन्द्रीय सदस्यद्वय प्रेमबहादुर पौडेल र कृष्णलाल पौडेलको विशेष आतिथ्यता रहेको थियो भने रुकुम पश्चिम शाखाका अध्यक्ष टोपबहादुर पौडेलको पनि उपस्थिति रहेको थियो।

भेलाले उदय के.सी. पौडेलको अध्यक्षतामा ११ सदस्यीय पौडेल वंश महासंघ नेपाल, रुकुम पूर्व जिल्ला शाखा (तदर्थ समिति) गठन गरेको छ । समितिको उपाध्यक्षमा मालती पौडेल, सचिवमा कमल पौडेल तथा कोषाध्यक्षमा खिमानन्द पौडेल चयन हुनुभएको छ । समितिका ५ जना सदस्यहरू पछि मनोनयन गरी पूर्णता दिने निर्णय भएको छ ।

करिब ३३ जना पौडेल वंशका व्यक्तिहरूको सहभागिता रहेको उक्त भेलाले जिल्लाभर रहेका पौडेल वंशका परिवारहरूको वंशावली संकलन गर्ने, कुलपूजा विधि तथा परम्परागत संस्कारहरूको संरक्षण र व्यवस्थापन गर्ने तथा पौडेल वंशको पहिचान र एकतालाई सुदृढ बनाउन पहल गर्ने आगामी बाटो तय गरेको छ ।

भेलाबाट गणेशबहादुर के.सी. पौडेलको संयोजकत्वमा ५ सदस्यीय सल्लाहकार समिति समेत गठन भएको छ । सल्लाहकार समितिका सदस्यहरूमा पञ्चबहादुर के.सी. पौडेल, दामोदर पौडेल, शोभाकर पौडेल र भगवान के.सी. पौडेल रहनुभएको छ ।

कार्यक्रमको सञ्चालन नवगठित समितिका अध्यक्ष उदय के.सी. पौडेलले गर्नुभएको थियो । कार्यक्रममा प्रमुख अतिथि हरिहर पौडेल, विशेष अतिथिहरु प्रेमबहादुर पौडेल, कृष्णलाल पौडेल तथा रुकुम पश्चिम शाखाका अध्यक्ष टोपबहादुर पौडेलले पौडेल वंशको इतिहास, परम्परा, कुलपूजा विधि, महासंघको उद्देश्य, भावी रणनीति तथा संगठन विस्तारका विषयमा प्रकाश पार्नुभएको थियो ।

सो अवसरमा प्रमुख अतिथि हरिहर पौडेलले रुकुम पूर्व शाखा पौडेल वंश महासंघ नेपालको ६७ औँ जिल्ला शाखा भएको जानकारी दिँदै संगठनलाई देशभर विस्तार गर्दै वंशीय एकता, सांस्कृतिक संरक्षण र पुस्तान्तरणमा महासंघले महत्वपूर्ण भूमिका खेल्ने विश्वास व्यक्त गर्नुभएको थियो ।