आठबिसकोटमा सरकारी खर्चमा किनिएका मोटरसाईकल निजी नम्वर प्लेटमा सञ्चालन

रुकुम पश्चिमको आठबिसकोट नगरपालिकाले सरकारी लगानीमा खरिद गरेका केहि मोटरसाईकलहरु व्यक्तिगत नम्वर प्लेटमा सञ्चालन हुने गरेका छन् । नगरपालिकाले विभिन्न मितिमा लाखौ रकम खर्च गरेर खरिद गरेका सात वटा मोटरसाईकलमा हालसम्म पनि निजी नम्वर प्लेट रहेको पाईएको छ । 

नगरपालिकाले २०७८ सालमा किनेका दुई वटा मोटरसाईकल र २०८१ सालमा किनेका पाँच वटा मोटरसाईकल निजी नम्वर प्लेटमा सञ्चालन भएको महालेखा परिक्षकको कार्यालयले जनाएको छ । मूलपाटीलाई प्राप्त महालेखा परिक्षकको कार्यालयले तयार पारेको ०८१/०८१ को लेखापरिक्षण प्रतिवेदन अनुसार २० लाख ५० हजार ३५६ रकममा खरिद गरिएका यी मोटरसाईकलहरु व्यक्तिगत नम्वर प्लेटमै सञ्चालन भईरहेका छन् । 

सवारी तथा यातायात व्यवस्था ऐन, २०४९ को दफा ९ अनुसार सरकारी सवारी पहिचानको लागि सवारी साधनको अगाडी वा पछाडी सेतो प्लेटमा रातो अक्षर र अंक उल्लेख हुनुपर्छ  । जुन कुरा सोहि दफाको अनुसूचि २ को खण्ड घ मा स्पष्ट रुपमा लेखिएको छ । तर, उक्त ऐन विपरित सरकारी मोटरसाइकल निजी नम्वर प्लेटमा सञ्चालन भईरहेका छन् । 

नगरपालिकाले २०७८ सालमा लु ८ ६ प ९५०५ र लु ७ १ प ७२९२ नम्वरको मोटरसाईकल प्रतिगोटा दुई लाख ५० हजार ३५४ रुपियाँको दरले खरिद गरेको थियो । यी मोटरसाईलमा सरकारी नम्वर प्लेट राखिएको छैन । 

नगरपालिकाले २०८१ मङसिर १६ गते तीन लाख १८ हजार ५२ रुपियाँमा खरिद गरेको लु ६७ प ५२१३ नम्वरको मोटरसाईकलमा पनि सरकारी नम्वर प्लेट नराखेको प्रतिवेदनमा उल्लेख गरिएको छ । 

त्यसैगरी नगरपालिकाले २०८१ पुस ११ गते चार वटा मोटरसाईकल एकसाथ खरिद गरेको थियो । लु प्र ०१००३ प १०२८, लु प्र ०१००४ प १३१६, लु प्र १००३ प ६०४७ र क प्र ०३००१ प ०७४७ नम्वरको मोटरसाईकल सरकारी रकममा किनिएको हो । यी मोटरसाईकलको मूल्य प्रतिगोटा तीन लाख सात हजार ८९९ रुपियाँ ९९ पैसा परेको उल्लेख छ । तर अझैसम्म यी मोटरसाईकलमा सरकारी नम्वर प्लेट राखिएको छैन । नीजि नम्वर प्लेटमै सञ्चालन भईरहेका छन् । 

महालेखाले ऐनको भएको व्यवस्था अनुसारको कार्य गरी सवारी साधनको व्यवस्थापनमा ध्यान दिन नगरपालिकाको ध्यानाकर्षण गराएको छ । 

यस बिषयमा नगरपालिकाका निमित्त प्रमुख प्रशासकीय अधिकृत राजेश गौतमले वडा र पालिकाको लागि खरिद भएका केहि मोटरसाईकलहरु नगरपालिकाको नाममा नामसारी नहोउन्जेलसम्म व्यक्तिगत नम्वर प्लेट राखेर चलाएको बताउनुभयो । 

उहाँका अनुसार अहिले पास भएर पनि कतिले सरकारी नम्वर प्लेट राखिसक्नु भएको छ भने कतिले राख्दै हुनुहुन्छ । सेतो नम्वर प्लेट नराखेका केहि मोटसाईकलहरु भने थुतेर नगरपालिकामा राखेको उहाँले मूलपाटीलाई जानकारी दिनुभयो ।