रुकुम पश्चिममा तीन जिल्लाको सुरक्षा बैठक : अपराध नियन्त्रण, विपद् व्यवस्थापन र शान्ति सुरक्षाको बिषयमा महत्वपूर्ण निर्णय

रुकुम पश्चिममा तीन जिल्लाका सुरक्षा अधिकारीहरु सम्मिलित अन्तर जिल्ला सुरक्षा समन्वय समितिको बैठक सम्पन्न भएको छ । 

जिल्ला सुरक्षा समिति रुकुम पश्चिमको आयोजनामा शनिबार भएको अन्तर जिल्ला सुरक्षा समितिको बैठकमा रुकुम पश्चिम, जाजरकोट र डोल्पा जिल्लाका जिल्ला सुरक्षा समितिका पदाधिकारीहरुको उपस्थिति रहेको थियो । बैठकमा तीन जिल्लाको शान्ती सुरक्षा, अपराध नियन्त्रण, विपद् जोखिम न्यूनिकरण तथा व्यवस्थापन, सुरक्षा गस्ती, सडक सुरक्षा लगायतका बिषयमा निर्णय तथा अन्तर्क्रिया गरिएको छ ।

रुकुम पश्चिमका प्रमुख जिल्ला अधिकारी निशान राज गौतमका अनुसार आजकाे बैठकमा यस अघि भएका बैठकका निर्णयहरूको कार्यान्वयनको अवस्था बारेमा समीक्षा गरिएको छ भने जिल्लाहरूको शान्ति–सुरक्षा तथा अपराध अवस्थाको पनि समीक्षा गरिएको छ । 

त्यसैगरी अन्तरसीमा अपराध नियन्त्रण (लागू औषध, जडीबुटी, वन्यजन्तु, अखेटोपहार, हातहतियार लगायतका अवैध  कारोबार तथा ओसारपसार) को बारेमा समन्वयात्मक रुपमा कार्य गर्ने निर्णय भएको छ भने विपद् जोखिम न्यूनीकरण तथा व्यवस्थापनको लागि समेत एकजुट भएर कार्य गर्ने बिषयमा छलफल भएको छ । 

बैठकमा अन्तरजिल्ला सडक यातायात तथा सडक सुरक्षा व्यवस्थापन, सुरक्षा गस्ती परिचालन लगायतका बिषयमा छलफल भई महत्वपूर्ण निर्णय भएको प्रमुख जिल्ला अधिकारी गाैतमले जानकारी दिनुभयो । 

अन्तर जिल्ला समन्वय बैठकमा रुकुम पश्चिमका प्रमुख जिल्ला अधिकारी निशान राज गौतम, जाजरकोटका प्रमुख जिल्ला अधिकारी खडानन्द अधिकारी र डोल्पाका प्रमुख जिल्ला अधिकारी जुनु हमाल ढकालको उपस्थिति रहेको थियो  त्यसैगरी तीन वटै जिल्लाका नेपाली सेना, नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका प्रमुखहरुको समेत सहभागीता रहेको थियो  ।