रुकुम पश्चिममा २ महिनामा ९ फरार प्रतिवादी पक्राउ

जिल्ला प्रहरी कार्यालय रुकुम पश्चिमले पछिल्लो दुई महिनामा नौ जना फरार प्रतिवादीलाइ पक्राउ गरेको छ । 

अदालतको फैसला कार्यान्वयनका क्रममा वैशाख र जेठ महिनामा नौ जनालाई विभिन्न स्थानबाट पक्राउ गरिएको प्रहरीले जनाएको छ । 
जिल्ला प्रहरी कार्यालयका सूचना अधिकारी प्रहरी निरीक्षक हरि प्रसाद पुनका अनुसार विभिन्न कसुरमा अदालतबाट दोषी करार भई फरार रहेका प्रतिवादी तथा अनुसन्धानका क्रममा रहेका प्रतिवादीहरुलाई पक्राउ गरिएको हो । पक्राउ पर्नेहरुमा कर्तव्य ज्यान, सवारी ज्यान,जालसाज,चेक अनादर, अभद्र व्यवहार र अपराधिक विश्वासघात गर्न नहुने मुदा शिर्षकका नौ जना रहेका छन् ।  

पक्राउ पर्नेमा कर्तव्य ज्यान मुद्दाका दुई जना रहेका छन् । उनीहरूलाई ९ वर्ष, एक महिना, २५ दिनको सजाय तोकिएको थियो । त्यसैगरी पक्राउ पर्नेमा सवारी ज्यानका १ जना रहेका छन् । उनलाई १ हजार जरिवानाको फैसला भएको थियो । 

जालसाज मुद्धामा फरार रहेका एक जनालाई पनि पक्राउ गरिएको छ । उनीलाई एक हजार १६० रुपैयाँ जरिवाना तथा सजाय फैसला भएको थियो भने एकजना चेक अनादर मुद्धामा फरार रहेका प्रतिवादी रहेका छन् ।

चेक अनादर मुद्धामा फरार रहेका प्रतिवादीलाई तीन हजार रुपियाँ जरिवाना फैसला थियो । प्रहरीका अनुसार १२ हजार जरिवाना फैसला भएका अभद्र व्यवहार मुद्दाका १ जनालाई पनि पक्राउ गरिएको छ ।  त्यस्तै अनुसन्धानका क्रममा रहेका आपराधिक विश्वासघात गर्न नहुने मुद्दाका ३ जनालाई पनि पक्राउ गरिएको छ । 

रुकुम जिल्ला अदालत मुसिकोट रुकुमबाट विभिन्न मिति र फैसला बमोजिम विभिन्न मुद्दामा कैद तथा जरिवाना भई हालसम्म फरार रहेका ९ जना प्रतिवादीहरूलाई जिल्ला प्रहरी कार्यालय र मातहत प्रहरी कार्यालयहरूबाट खटिएको संयुक्त प्रहरी टोलीले पक्राउ गरी अदालतमा पेस गरेको जिल्ला प्रहरी कार्यालयले जानकारी गराएको छ ।