भूमेमा एकीकृत पाठ्यक्रम कार्यान्वयनका लागि शिक्षकलाई तालिम 

रुकुम पूर्वको भूमे गाउँपालिका एकीकृत पाठ्यक्रम कार्यान्वयन तथा निरन्तर बिद्यार्थी मूल्याङ्कन सम्बन्धी शिक्षक क्षमता अभिबृद्धि तालिम शुरु गरीएको छ ।

भूमे गाउँपालिका रुकुम पूर्वको आयोजनामा बैशाख २१ गतेदेखि २५ सम्म सञ्चालन हुने ५ दिवसिय उक्त तालिमको समन्वय तथा प्राबिधिक सहयोग यूनिसेफ नेपाल, ब्रिटिस काउन्सिल र कालिका स्वावलम्वन सामाजिक केन्द्र कपिलवस्तुले गरेको छ । 

एकीकृत पाठ्यक्रम कक्षा १ देखि ३ को प्रभावकारी कार्यान्वयन र निरन्तर मूल्याङ्कन प्रणालीमा शिक्षकहरुको पेशागत विकास गरी बालबालिकाहरुको सिकाई उपलब्धिलाई अपेक्षित बनाउन यो तालिमको आयोजना गरीएको भूमे गाउँपालिका शिक्षा, यूवा तथा खेलकुद शाखा प्रमुख टेक बहादुर बुढाथोकीले बताउनुभयो ।

गाउँपालिका अध्यक्ष होम प्रकाश श्रेष्ठको अध्यक्षतामा उद्घाटन गरीएको उक्त तालिममा प्रमुख प्रशासकीय अधिकृत देबिलाल बिक, शिक्षा यूवा तथा खेलकुद शाखा प्रमुख टेक बहादुर बुढाथोकी, ब्रिटिस काउन्सिलका अशेष भट्टराई, कालिका स्वावलम्वन सामाजिक केन्द्र कपिलवस्तुका कार्यक्रम ब्यवस्थापक हरी चन्द्र चौधरी र शिक्षा प्राबिधिक अधिकृत केशव बिसीको आतिथ्यता रहेको थियो ।

उद्घाटन सत्रमा बोल्दै पालिका अध्यक्ष होम प्रकाश श्रेष्ठले शिक्षा क्षेत्र सुधार पालिकाको प्राथमिकताको क्षेत्र रहेको बताउदै यो तालिमले शिक्षकहरुमा प्राबिधिक दक्षता विकास गर्ने र बिद्यालयमा यसको अभ्यास मार्फत आधारभूत तहका बिद्यार्थिको पठन पाठन ब्यवस्थित र प्रभावकारी हुने अपेक्षा रहेको बताउनुभयो ।

तालिममा भूमे गाउँपालिकाका सामुदायिक विद्यालय अन्तर्गत आधारभूत तह कक्षा १देखि ३ मा अध्यापनरत ३४ जना शिक्षकहरुको सहभागीता रहेको छ । तालिमको सहजीकरण ब्रिटिस काउन्सिलका एकेडेमिक कोर्डिनेटर अशेष भट्टराई र कालिका स्वावलम्वन सामाजिक केन्द्र कपिलवस्तुका हरी चन्द्र चौधरीले गरीरहनुभएको छ ।