द्वन्द्वकालमा बरामद गरी बंकरमा राखिएका ८६ बम सेनाद्वारा निष्क्रिय

जिल्ला प्रहरी कार्यालय सल्यानको परिसरभित्र भवन निर्माणका लागि जग खन्ने क्रममा फेला परेका ८६ वटा बम नेपाली सेनाले निष्क्रिय पारेको छ ।

गत बुधबार दिउँसो शारदा नगरपालिका–३ स्थित प्रहरी कार्यालय परिसरमा जग खन्ने क्रममा शङ्कास्पद वस्तु फेला परेपछि सुरक्षा सतर्कता बढाइएको थियो । निरन्तरको उत्खननका क्रममा शनिबार बिहानसम्म कुल ८६ वटा बम फेला परेको जिल्ला प्रहरी कार्यालय सल्यानले जनाएको छ ।

फेला परेका विस्फोटक सामग्रीमध्ये ८२ वटा सकेट बम, तीन वटा सुतली बम र एउटा बोतल बम रहेका छन् । साथै उत्खननका क्रममा सात थान रेडियो वेभ उपकरण, करिब ५०० ग्राम विस्फोटक पदार्थ, दुई केजी बम निर्माणमा प्रयोग हुने सामग्री तथा १० मिटर फायरिङ केबलसमेत बरामद गरिएको छ ।

जिल्ला प्रहरी कार्यालय सल्यानका प्रमुख प्रहरी नायब उपरीक्षक (डीएसपी) डा. हेमबहादुर केसीका अनुसार बम फेला परेपछि तत्काल नेपाली सेनाको सिद्धीबक्स गणसँग समन्वय गरी सुरक्षा व्यवस्था कडा पारिएको थियो । थप बम फेला परेपछि नं. १९ बाहिनी तुलसीपुर, दाङ र कालीभक्ती गण भैरहवाबाट आएको बम डिस्पोजल टोलीले ती सामग्री निष्क्रिय पारेका हुन् ।

शनिबार सेनानी श्रीप्रसाद रामजालीको नेतृत्वमा रहेको इन्जिनियर टोली तथा सिद्धीबक्स गण सल्यानबाट सेनानी महेश अधिकारीको नेतृत्वमा खटिएको टोलीले सबै बम सुरक्षित रूपमा निष्क्रिय पारेको प्रहरीले जनाएको छ ।

प्रारम्भिक अनुमानअनुसार ती बमहरू सशस्त्र द्वन्द्वकालमा बरामद गरी बंकरमा राखिएको र समयक्रममा पुरिएको हुनसक्ने देखिएको छ । हाल उक्त क्षेत्रको सुरक्षा अवस्था सामान्य रहेको छ ।