जेष्ठ नागरिकलाई घाईते बनाएर भागेको आरोपमा चार युवा पक्राउ

रुकुम पश्चिममा एक जेष्ठ नागरिकलाई मोटरसाईकलले ठक्कर दिई फरार रहेको आरोपमा चार जना पक्राउ परेका छन् ।  

जिल्ला प्रहरी कार्यालय रुकुम पश्चिमले सानीभेरी गाउँपालिका ९ हाँसिबाङका ७५ वर्षीय दलु ओलीलाई ठक्कर दिएका भागेको आरोपमा चार जनालाई नियन्त्रणमा लिएको हो । 

जिल्ला प्रहरी कार्यालयका प्रमुख, प्रहरी नायब उपरीक्षक (डिएसपी) बेदबहादुर पौडेलका अनुसार पक्राउ पर्नेहरुमा बाँफिकोट गाउँपालिका ७ का पारस अधिकारी, सोही स्थानका हरिबोल अधिकारी, खेमराज अधिकारी र बिनोद अधिकारीलाई पक्राउ गरिएको हो । चारै जनालाई अनुसन्धानको लागि आईतबार नियन्त्रणमा लिईएको हो । 

डिएसपी पौडेलका अनुसार गत वैशाख ९ गते सानीभेरी गाउँपालिका वडा नम्बर ९ को हाँसिवाङमा मोटरसाइकलले सडकमा पैदल हिँडिरहेका ७५ वर्षीय ओलीलाई ठक्कर दिएर घाइते बनाएको थियो । सिम्लीदेखी छिवाङतर्फ जाँदै गरेको नम्वर नखुलेको मोटरसाईकले ठक्कर दिँदा घाईते हुनुभएका ओलीलाई जिल्ला अस्पताल सल्लेमा लिईएको थियो भने १० गते थप उपचारको लागि रिफर गरिएको थियो ।

गम्भीर अवस्थामा रहेका ओलीको मेडिकल कलेज कोहलपुरमा उपचार भइरहेको छ । उहाँको एउटै खुट्टा तीन ठाउँमा भाँचिएको छ भने पेटमा रगत जमेको छ । त्यसैगरी मेरुदण्डमा पनि गम्भिर चोट रहेको छ । उहाँलाई आईसियुमा राखेर उपचार भईहेको छ ।