रुकुम पश्चिमका सिडियो, डिएसपी नै अफिम खेती नष्ट गर्न कस्सिएपछि ...(भिडियोसहित)

रुकुम पश्चिमका प्रमुख जिल्ला अधिकारीसहित सुरक्षा निकायका प्रमुखहरु नै अवैध लागुऔषधको खेती नष्ट गर्ने कार्यमा सक्रिय हुनुभएको छ । जिल्लाका विभिन्न स्थानमा अवैध रुपमा लागुऔषध (गाजा, चरेस, अफिम) को खेती भईरहेको पाईएपछि खेती नै नष्ट गरिएको हो ।

बिहिबार मात्र आठबिसकोट नगरपालिका वडा नम्वर २ को पहाडा र वडा नम्वर ५ को गोतामकोटको ५८ रोपनी जग्गामा लगाईएको अफिम नष्ट गरिएको जिल्ला प्रहरी कार्यालयले जनाएको छ । प्रहरी नायब उपरीक्षक (डिएसपी) बेदबहादुर पौडेलका अनुसार पहाडामा २८ रोपनी र गोतामकोटमा ३० रोपनी जग्गामा लगाईएको अफिम नष्ट गरिएको हो ।

अफिम फडानी कार्यमा प्रमुख जिल्ला अधिकारी दिनेश प्रसाद थानी, प्रहरी नायब उपरीक्षक बेदबहादुर पौडेल, प्रमुख अनुसन्धान अधिकृत नेवबहादुर राणा लगायतको टोली संलग्न भएको थियो । 

डिएसपी पौडेलका अनुसार चालु आर्थिक वर्षको हालसम्म मात्रै ५१८ रोपनी जग्गामा लगाईएको अफिम नष्ट गरिएको छ । जिल्ला प्रहरी कार्यालय मातहतका विभिन्न २० वटा प्रहरी कार्यालयले विभिन्न स्थानमा लगाईएको गाजा, अफिम नष्ट गरेका हुन् ।

सबैभन्दा बढी आठबिसकोट नगरपालिकाका विभिन्न स्थानहरुमा तथा सानीभेरी र बाँफिकोट गाउँपालिकाका केहि वडाहरुमा लगाईएको अफिम खेती नष्ट गरिएको जिल्ला प्रहरी कार्यालयले जनाएको छ । 

जिल्ला प्रहरी कार्यालयको तथ्याङक अनुसार विगत देखि नै अफिम नष्ट गर्ने गरिएको छ । कार्यालयले सञ्चालन गरेको अफिम, गाँजा फडानी अभियान अन्तर्गत सुरक्षाकर्मी र सरोकारवाला निकायको सक्रियतामा आर्थिक वर्ष ०७६/०७७ मा १० बिगाहा जमिनमा लगाएको अफिम नष्ट गरिएको थियो । त्यसैगरी आ.व.०७७/०७८ मा १८ बिगाहा सात रोपनी, ०७८/०७९ मा सात बिगाहा, ०७९/०८० मा १५० रोपनी, ०८०/०८१ मा २४० र ०८१/०८२ मा २६० रोपनी क्षेत्रफलमा लगाईएको गाँजा तथा अफिम नष्ट गरिएको छ ।

चालु आवको फागुन अन्तिमबाट सुरु भएको अवैध गाजा, अफिम फडानी अभियान अन्तर्गत करिब ४५ दिनमै ५१८ रोपनी जग्गामा लगाईएको अफिम फडानी गरिएको छ । खाली जमिनमा आफै उम्रेका र खेतीपाती गरिएका गाँजा, अफिम फडानी गरी नष्ट गरिएको हो ।  

जिल्ला प्रशासन कार्यालयले पनि लागुऔषध नियन्त्रणका लागि तीन महिने कार्ययोजना निर्माण गरेर कार्यान्वयन गरिरहेको छ । सोहि कार्य योजना कार्यान्वयनको क्रममा खेती नै नष्ट गरिएको हो । 

प्रमुख जिल्ला अधिकारी दिनेश प्रसाद थानीले जिल्लामा हुनसक्ने लागुऔषधको अवैध उत्पादन, कारोबार तथा उपयोगलाई पूर्ण रुपमा नियन्त्रण गरी समाजलाई सभ्य, मर्यादित र सुरक्षित बनाउने लक्ष्यका साथ कार्ययोजना बनाएर कार्यान्वयन गरिरहेको बताउनुभयो ।

उहाँले लागुपदार्थको उत्पादन, भण्डारण तथा सेवन हुन नदिने, सचेतनामूलक कार्यक्रम सञ्चालन गर्ने, अनुगमन तथा चेकजाँचलाई थप प्रभावकारी बनाउने, सेवनकर्ताहरुको पहिचान गरेर उचित व्यवस्थापन, उपचार तथा पुनःस्थापनाको व्यवस्था मिलाउने उद्धेश्यले तीन महिने कार्ययोजना कार्यान्वयमा ल्याएको जनाउनुभयो ।

हेरौ भिडियो :