दुई पटक म्याद थप्दा पनि पुरा भएन जिल्ला अस्पतालको भवन, फेरि म्याद थपको पर्खाइ

रुकुम पश्चिमस्थित जिल्ला अस्पताल भवन निर्माणको लागि दुई पटक म्याद थप हुँदा पनि पुरा हुन सकेको छैन । निर्माणको करिब अन्तिम चरणमा रहेको अस्पताल पुरा गरेर हस्तान्तरण गर्न अझै म्याद थप गर्नुपर्ने बताईएको छ । 

२०४५ सालमा निर्माण भएको १५ शैयाको जिल्ला अस्पताल ३७ वर्षसम्म पनि उहि संरचना र पुर्वाधारमा सञ्चालन भईरहेको अस्पताल विकास समितिका अध्यक्ष टेकबहादुर कुसारीले जानकारी दिनुभयो । उहाँका अनुसार अस्पतालको क्षमता स्तरोन्नती र निर्माणधिन भवनको यथासक्य निर्माणका लागि विभिन्न निकायमा धाँउदा पनि समस्या समाधान हुन सकेको छैन । 

२०७८ सालदेखि निर्माण सुरु भएको अस्पताल भवन निर्माणमा ढिलाई हुँदा सेवा प्रवाहमा समेत सहजता आउन सकेको छैन । भौतिक पूर्वाधार र जनशक्ति अभावमा रहेको जिल्ला अस्पतालमा बिरामीहरुको चाप भने हरेक वर्ष बढीरहेको छ । अस्पतालका अनुसार सम्झौता भएको तीन वर्षभित्र निर्माण सम्पन्न हुने गरी २०७८ साल असार ३१ गते खानी थोदुङ मिसन जेभी निर्माण कम्पनीले भवन निर्माणको लागि सम्झौता गरेको थियो ।

२०८१ असार ३१ भित्र निर्माण सम्पन्न हुने गरी २३ करोड १५ लाख पाँच हजार २९१ रुपियाँमा भवन निर्माणको सम्झौता भएको थियो । तर अझैसम्म पनि भवन पुरा भएर हस्तान्तरण हुन सकेको छैन । यसबिच दुई पटक म्याद थप भईसकेको छ । 

पछिल्लो समय २०८२ कात्तिक २८ गतेसम्म म्याद थप भएको थियो । त्यसयता म्याद थपको लागि जिल्ला अस्पतालले सघन सहरी विकास कार्यालय जुम्लालाई पत्र भने पठाएको छ । तर म्याद थपको पत्र आएको छैन । जिल्ला अस्पतालका लेखापाल रामबहादुर केसीका अनुसार हालसम्म अस्पताल भवन निर्माणको ९७ प्रतिशत प्राविधिक र ९५ प्रतिशत वित्तीय प्रगती भएको देखिन्छ ।

निर्माणको अन्तिम चरणमा रहेको भवन हस्तान्तरणका लागि म्याद थपको औपचारिक पत्रसँगै विद्युत जडान, फर्स र एङगल मिलानको काम मात्र बाँकि रहेको देखिन्छ । विद्युत लाईन जडानमा हुने थप खर्च समेत व्यवस्थापन हुन सकेको छैन । 

अस्पतालका अनुसार लामो समयदेखि यहाँ खानेपानीको समेत समस्या भईरहेको छ । स्थानीयले आफूले उपभोग गरिरहेको पानी अस्पताललाई दिएर सहयोग गरिरहेका छन् । यसैगरी अस्पतालबाट सिर्जित फोहोरको उचित व्यवस्थापन, घेराबार, कर्मचारीहरुको आवास समेत समस्या भईरहेको छ । २०४५ सालमै निर्माण भएको पोष्टमार्टम भवन समेत जीर्ण अवस्थामा रहेको छ ।

जिल्लामा शवगृह नहुँदा पोष्टमार्टम भवनमै शव राख्नुपर्ने र कहिलेकाँहि एक भन्दा बढी शव हुँदा व्यवस्थापन तथा सुरक्षामा कठिनाई हुने गरेको छ । पोष्टमार्टम घरकै छेउछाउमा स्थानीयको बसोबास रहेको कारण दुर्गन्ध फैलिएको, शवको सुरक्षा नभएको गुनासो आउने गरेको छ । नवनिर्मित भवन अस्पताललाई हस्तान्तरण भएको खण्डमा सेवा प्रवाहमा थप सहजता आउने बताईएको छ ।