बाँफिकोटमा नागरिक सुनुवाई र सचेतनामूलक कार्यक्रम सम्पन्न

रुकुम पश्चिमको बाँफिकोट गाउँपालिकामा नागरिक सुनुवाई, सार्वजनिक सुनुवाई र सचेतनामूलक कार्यक्रम एक साथ सम्पन्न गरिएको छ । 

बुधबार जिल्ला प्रशासन कार्यालय र जिल्ला प्रहरी कार्यालयको संयुक्त आयोजनामा उक्त कार्यक्रम सम्पन्न गरिएको हो । नागरिकका गुनासाहरु संकलन तथा सम्बोधन गर्ने, समस्याहरुको समाधान गर्ने र जनचेतना फैलाउने उद्धेश्यले उक्त कार्यक्रम गरिएको बताईएको छ । 

बाँफिकोट गाउँपालिकाको सभाहलमा भएको उक्त कार्यक्रममा सहभागीहरुले जिल्ला प्रशासन कार्यालयबाट प्रदान गरिने नागरिकताको बिषयमा रहेका अन्यौलता, बाल विवाह र बाल विवाहपछि जन्मेका बच्चाहरुको जन्मदर्ता, लागु पदार्थको नियन्त्रण, प्रहरीसँगको नागरिकको पहुँच, सार्वजनिक सेवा प्रवाह, वडा कार्यालयबाट हुने सिफारिस लगायतका बिषयमा जिज्ञासा तथा सुझाव राखेका थिए । 

नागरिकका जिज्ञासाहरुको जवाफ प्रमुख जिल्ला अधिकारी दिनेश प्रसाद थानी, प्रहरी नायब उपरीक्षक बेदबहादुर पौडेलले दिनुभएको थियो । प्रमुख जिल्ला अधिकारी थानीले नागरिकले सरल, सहज र सुलभ तरिकाले सेवा पाउन भनेर विभिन्न निकायमा जिम्मेवारी प्रदान गरेकोले राज्यले प्रदान गरेको जिम्मेवारी कुशल तरिकाले वहन गर्नुपर्नेमा जोड दिनुभयो ।

उहाँले सार्वजकि सेवा प्रवाहको सवालमा कुनै समस्या तथा जिज्ञासा भएमा जिल्ला प्रशासन कार्यालय आवश्यक समन्वय, सहजीकरण तथा समस्या समाधानका लागि प्रतिबद्ध रहेको बताउनुभयो । प्रजिअ थानीले सार्वजनिक सेवा प्रवाह र यसको प्रभावकारीता, विभिन्न कानूनी प्रावधानहरुको बारेमा समेत सहभागीहरुलाई जानकारी गराउनुभएको थियो । 

यसैगरी प्रहरी नायब उपरीक्षक बेदबहादुर पौडेलले नागरिक प्रहरी सहकार्य, लागु पदार्थ दुव्र्यसनीको अवस्था, असर र कानूनी व्यवस्था, वालविवाह, ट्राफिक सचेतना लगायतका बिषयमा सहजीकरण गर्नुभएको थियो । 

कार्यक्रममा बाँफिकोट गाउँपालिकाका अध्यक्ष अध्यक्ष जनक कुमार बाँठा र उपाध्यक्ष तारा बुढा केसी, राष्ट्रिय अनुसन्धान विभाग जिल्ला कार्यालय रुकुम पश्चिमका प्रमुख अनुसन्धान अधिकृत नेवबहादुर राणा, बाँफिकोट गाउँपालिकाका प्रमुख प्रशासकीय अधिकृत विकास विक्रम शाह लगायत जनप्रतिनिधि, कर्मचारी र सर्वसाधारणहरुको सहभागिता रहेको थियो ।