साँघुरा घुम्ती चौडा बनाउँदै सडक डिभिजन

सडक डिभिजन कार्यालय चौरजहारीले जाजरकोटको मुख्य सडकमा रहेका साँघुरा घुम्ती (मोड) चौडा बनाईएको छ । सल्लीबजार–जाजरकोट सडकखण्ड अन्तर्गत जाजरकोटको बोहरागाउँ देखि छेडागाडसम्मको सडकमा रहेका साँघुरा घुम्ती फराकिलो बनाईएको हो । 

कार्यालयले आफ्नै उपकरण र जनशक्ति परिचालन गरेर घुम्तीहरु चौडा बनाएपछि दुर्घटनाको जोखिम घट्ने अपेक्षा गरेको छ । डिभिजन कार्यालयका प्रमुख खुमबहादुर भण्डारीका अनुसार सडक सुरक्षा सुधार गर्ने उद्धेश्यले उक्त कार्य गरिएको हो । उहाँले खलङगा देखि छेडागाडसम्म रहेका विभिन्न स्थानका जोखिमपूर्ण मोडहरुलाई विस्तार गरेर सवारी साधन आवतजावत सहज बनाइएको बताउनुभयो । 

साँघुरा घुम्तीहरुको पहिचान गरेर ती घुम्तीहरुको क्षेत्रगत दुरी बढाउन लागिएको हो । डिभिजन प्रमुख भण्डारीले निश्चित गतिमा हिडिरहेको गाडीलाई अन्य बस्तु तथा साधनसँग ठोक्किनबाट जोगाउन घुम्ती सुधार कार्यलाई तिब्र पारिएको जनाउनुभयो ।

जिल्ला सदरमुकामबाट सुर्खेत, नेपालगञ्ज, काठमाडौं र डोल्पा जिल्लामा आवतजावतका लागि मुख्य सडक रहेको यस सडकखण्डमा दैनिक दर्जनौ साना तथा ठुला सवारी साधनहरु आउजाउ गर्ने गर्दछन् । २०६४ सालमा निर्माण सम्पन भएको यो सडक जिल्लाको मुख्य सडक हो ।

पहिला साँघुरा र तीखा घुम्तीका कारण सवारी साधन चलाउन कठिन हुने र दुर्घटनाको सम्भावना उच्च गरेको चालकहरू बताउँछन् । चालक अर्जुन चौधरीले घुम्ती चौडा बनाएपछि अब सवारी साधन मोड्दा सजिलो भएको र दुर्घटनाको जोखिम पनि घटेको बताउनुभयो । उहाँका अनुसार मोड काट्दा निकै मुश्किल हुने गरेकोमा अब भने सजिलो भएको छ । 

स्थानीयवासीहरूले पनि सडक स्तरोन्नतिले यात्रुहरुको सुरक्षा बढ्ने अपेक्षा व्यक्त गरेका छन् । भेरी नगरपालिका ११ का तेज शर्माले साँघुरो मोडका कारण आफ्नै गतिमा गुडिरहेको सवारी साधन पटक पटकका मोडहरुमा पुग्दा मोड नपुग्ने, रोकिएर मोड्नुपर्ने, विपरित दिशातर्फबाट आएको साधनसँग ठोक्किने डर हुने लगायतका जोखिम रहेको उल्लेख गर्नुभयो । अब भने उक्त जोखिम कम भएको शर्माको भनाइ छ । 

डिभिजन कार्यालयका नायब सुब्बा धनवीर केसीले बोहरागाउँबाट सुरु गरिएको मोड चौडा बनाउने अभियान छेडागाडसम्म हुने र त्यहाँसम्मका ५४ वटा मोड चौडा बनाउने बताउनुभयो । सब ईन्जिनियर विवश नाथ योगीको नेतृत्वको टोली फिल्डमै रहेर घुम्ती फराकिलो पार्ने कार्य निरन्तर गरिरहेको केसीले जनाउनुभयो । हालसम्म ३० बढी मोड चौडा पारिएको छ ।

सडक विभागको यान्त्रिक महाशाखाबाट उपकरणहरु ल्याएर उक्त कार्यमा विभागकै जनशक्ति उपयोग गरिएको छ । यसअघि पाँच देखि सात मिटरको दुरीमा रहेका सडकका मोडहरु हाल १० देखि १२ मिटरसम्म चौडा बनाईएको छ । सडक डिभिजन कार्यालयले आगामी दिनमा पनि जोखिमयुक्त सडक खण्डहरूको पहिचान गरी सुधारका कामलाई निरन्तरता दिने जनाएको छ ।