चौरजहारीका २० युवालाई व्यक्तित्व विकास तालिम 

रुकुम पश्चिमको चौरजहारीमा दुई दिने व्यक्तित्व विकास तालिम सम्पन्न भएको छ । 

मानव विकास तथा सामुदायिक सेवाले सञ्चालन गरेको 'राइज अप' परियोजनाको आयोजनामा युवाहरुलाई लक्षित गरेर तालिम सञ्चालन गरिएको हो । तालिममा २० जना युवाहरुको सहभागिता रहेको परियोजना अधिकृत सन्देश जैसीले जानकारी दिनुभयो । 

तालिममा वृत्ति विकासको अवधारणा, यसको महत्व र प्रभावकारी योजना निर्माण, उद्धेश्य निर्धारण, लक्ष्य छनौट, अपांगता भएका व्यक्तिहरुको स्वाबलम्बनका उपायहरु लगायतका विषयमा सहजीकरण गरिएको थियो । 

तालिमको सहजीकरण चौरजहारी नगरपालिकाका निमित्त प्रमुख प्रशासकीय अधिकृत शेर प्रसाद ढकाल र जनस्वास्थ्य अधिकृत रामवहादुर सुनारले गर्नुभएको थियो । 

परियोजना अधिकृत जैसीका अनुसार परियोजनाले अपांगता भएका व्यक्तिहरुको पक्षमा वकालत गर्नुका साथै सहयोग तथा क्षमता विकास, कम लगानीमा बढी लाभ लिन सकिने क्षेत्रहरु छनौट, युवाहरुको व्यवसाय तथा आर्थिक विकास लगायतका बिषयमा कार्य गर्दै आईरहेको छ । 

तालिममा चौरजहारी नगरपालिकाका विभिन्न वडाका युवाहरुको सहभागिता रहेको थियो । सहभागीहरुलाई प्रमाण पत्र समेत वितरण गरिएको छ । 

परियोजना अधिकृत सन्देश जैसीको अध्यक्षता भएको कार्यक्रममा नेपाल पत्रकार महासंघ रुकुम पश्चिमका अध्यक्ष गोपालप्रसाद रेग्मी, परियोजनाका वित्तीय अधिकृत सुस्मिता विक, फिजियोथेरापिस्ट उर्मीला शर्मा लगायतको उपस्थिति रहेको थियो ।