मुसिकोटको 'भाईरल' पुलबाट हाम्फालेर एक किशोरको मृत्यु

रुकुम पश्चिमको मुसिकोट नगरपालिका १ स्थित झोलुङगे (भाईरल) पुलबाट हाम्फालेर एक किशोरको मृत्यु भएको छ ।

जिल्ला प्रहरी कार्यालयका अनुसार त्रिवेणी गाउँपालिका १० सालघारी निवासी कर्णबहादुर ओलीका छोरा १७ वर्षीय महेन्द्र ओलीको मृत्यु भएको हो ।

जिल्ला प्रहरी कार्यालयका सूचना अधिकारी प्रहरी निरीक्षक हरिप्रसाद पुनका अनुसार खलंगाको बहराहटाकुरा र सल्ले जोड्ने पुलबाट आज बिहान ३ बजे महेन्द्रले हाम्फालेको भनि सूचना प्राप्त भएको हो । 

पुलबाट करिब दुई सय मिटर तल खोलामा खसेका महेन्द्रको टाउको फुटेको मृत अवस्थामा रहेको प्रहरीको भनाई छ । दुई ढुंगाको बिचमा शव रहेको छ । 

कक्षा १२ मा अध्ययनरत महेन्द्र मुसिकोट नगरपालिका -१ स्थित कारागार नजिकै कोठा भाडामा बस्दै आएका थिए । 

घटनास्थलमा प्रहरी निरीक्षक पुनको नेतृत्वमा प्रहरी टोली पुगेर आवश्यक अनुसन्धान तथा कागजी प्रक्रियाको काम गरिरहेको छ । पुलबाट हाम्फाल्नुको कारण थप अनुसन्धानपछि खुल्ने बताईएको छ ।