दुबईमा एक रुकुमेलीको हातका औला काटिए, सहयोगका लागि याचना 

बैदेशिक रोजगारीको लागि दुबई जानुभएका रुकुम पश्चिमका एक पुरुषको हातका औला काटिएका छन् । 

आठबिसकोट नगरपालिका वडा नम्वर ३ खदी निवासी ४० वर्षीय दिपक बोहराको दाँया हातका औला काटिएका हुन् । कम्पनिमा काम गर्ने क्रममा मेसिनमा परेर उहाँको हातका तीन वटा औला काटिएको उहाँको श्रीमती मनकुमारी बोहराले बताउनुभयो । 

उहाँका अनुसार माघ मसान्तको दिन कम्पनीमा सामान लोड गर्ने बेला मेसिनमा हात परेपछि हातका तीन औला काटिएका थिए । त्यसलगत्तै अस्पतालमा भर्ना गरिएको थियो । सुरुमा कम्पनीले उपचार खर्चमा सहयोग गरेपनि अहिले आफैले खर्च बेहोर्नु परेको छ ।

तीन महिना सम्म हात चलाउन नमिल्ने, अर्काको देशमा कोठामै थन्किनुपर्ने र आम्दानी नभएपछि नियमित उपचारमा समस्या भएको उहाँले जानकारी दिनुभयो । बोहरा विगत ६ वर्षदेखि दुबइमा कार्यरत हुनुहुन्छ । 

घाईते बोहराका साला सत्य बुढा क्षेत्रीका अनुसार भिनाजुको बोहराको उपचारको लागि हाल आर्थिक अभाव भएको छ । काम गर्न नसक्ने भएपछि उहाँ दुबइस्थित कोठामा रहनुभएको छ भने आर्थिक अभावको कारण थप उपचार हुन सकिरहेको छैन । 

आफ्नो भिनाजुको उपचारको लागि सम्पूर्ण मनकारी तथा सहयोगीहरुलाई सहयोगका याचना गरिएको क्षेत्रीले जानकारी दिनुभयो । उहाँले भिनाजुको बैंक खाता नभएकोले आफ्नै खाता उपलब्ध गराएर आर्थिक रकम संकलन गरिरहेको जनाउनुभयो । 

उहाँले तल उल्लेखित क्युआर अथवा एनएमबी बैकमा रहेको ९८४९६६९४४७ नम्वरको खातामा रकम सहयोग गर्न सकिने जनाउनुभएको छ ।