बाँफिकोटका मतदान केन्द्रमा सुरक्षा निकायको टोली

रुकुम पश्चिमको बाँफिकोट गाउँपालिकामा रहेका सबै मतदान केन्द्रहरुको एकैदिन अगुनमन गरिएको छ । 

गाउँपालिकाका १० वटै वडामा रहेका मतदानस्थल तथा केन्द्रहरुको जिल्ला सुरक्षा समितिले आइतबार अनुगमन गरेको हो । 

प्रमुख जिल्ला अधिकारी दिनेश प्रसाद थानीको नेतृत्वमा गएको अनुगमन टोलीले स्थलगत तथा सरोकारवाला निकायहरुसँग छलफल गरेर मतदान केन्द्रको अनुगमन गरेको हो । 

सो क्रममा मतदान केन्द्रको सुरक्षा संवेदनशिलता, अन्य अवस्था, खटिएर जाने कर्मचारीहरुको सहज व्यवस्थापन, निर्वाचन सामाग्रीहरुको व्यवस्थापन, मतपेटिकाहरुको ढुवानी लगायतका बिषयमा अनुगमन तथा छलफल भएको प्रमुख जिल्ला अधिकारी दिनेश प्रसाद थानीले जानकारी दिनुभयो । 

उहाँका अनुसार सो क्रममा गाउँपालिकाका अध्यक्ष, उपाध्यक्ष तथा कर्मचारीहरु, स्थानीय राजनीतिक दलका प्रतिनिधिहरु, शिक्षक तथा सर्वसाधारणहरुसँग समेत निर्वाचनको बिषयमा छलफल गरिएको छ । 

अनुगमन टोलीमा प्रमुख जिल्ला अधिकारी दिनेश प्रसाद थानी, प्रहरी नायब उपरीक्षक बेद बहादुर पौडेल, सशस्त्र प्रहरी नायब उपरीक्षक जगदिश चन्द्र हमाल, प्रमुख अनुसन्धान अधिकृत नेबबहादुर राना लगायतको उपस्थिति रहेको थियो ।