निर्वाचनमा बालबालिका प्रयोग नगर्ने प्रतिबद्धता

रुकुम पश्चिमका राजनीतिक दलहरुले निर्वाचनका गतिविधीहरुमा बालबालिकाको प्रयोग नगर्ने प्रतिबद्धता जनाएका छन् । 

आईतबार बाल अभियानका लागि साझा अभियानले जिल्ला सदरमुकाम मुसिकोटमा राजनीतिक दल र नागरिक समाज बिच गरेको अन्तरक्रिया कार्यक्रममा उनीहरुले निर्वाचनका गतिविधीहरुमा बालबालिकाको प्रयोग नगर्ने प्रतिबद्धता जनाएका हुन् । 

कार्यक्रममा नेपाली कांग्रेसका सचिव यज्ञ बिष्टले लोकतान्त्रिक मूल्य र मान्यता अनि निर्वाचन आचारसंहिताको पूर्ण पालनामा कांग्रेस प्रतिबद्ध रहेको जनाउनुभयो । कार्यक्रममा नेकपा (एमाले) का सचिव शशिराम परियारले भविष्यका कर्णाधारहरुलाई चुनावी प्रयोजनमा प्रयोग गरिनु गलत भएकोले सबैजनाले आचारसंहिताको पालना गर्नुपर्नेमा जोड दिनुभयो । 

त्यसैगरी नेपाली कम्युनिष्ट पार्टीका सुन्दर शर्माले राजनीतिक दलहरुले नै आचारसंहिता तथा नियमको व्यवस्था गरेकोले कार्यान्वयन गर्नमा पछि नपर्ने उल्लेख गर्नुभयो । 

कार्यक्रममा राष्ट्रिय स्वतन्त्र पार्टीका दिपेन्द्र बिष्ट, प्रगतिशिल लोकतान्त्रिक पार्टीका दलबहादुर खड्का, राष्ट्रिय जनमोर्चाका सत्यनारायण श्रेष्ठ, उज्यालो नेपाल पार्टीका उत्तम प्रसाद भट्टराई, नेकपा (सयुक्त) का कमल केसी लगायतले निर्वाचन गतिविधीहरुमा बालबालिकाको प्रयोग नगर्ने प्रतिबद्धता जनाउनुभयो । यसका साथै विद्यालय क्षेत्रमा राजनीतिक दलका चुनावी कार्यक्रम नगर्न, सरकारी कर्मचारीहरु प्रचार कार्यक्रममा नलाग्न समेत उहाँहरुले अनुरोध गर्नुभयो ।  

कार्यक्रममा बाल अभियानका लागि साझा अभियान कर्णालीका सम्पर्क व्यक्ति टेकराज आचार्यले निर्वाचनमा बालबालिकाको प्रयोग निर्वाचन आचारसंहिता र संविधान विपरित हुने बताउनुभयो । उहाँले आचारसंहिताको उल्लंघन भएको बेला हरेक नागरिकले सरोकारवाला निकायमा सूचना दिनुपर्ने र उल्लघन भएको खण्डमा दल तथा उम्मेदवारलाई कारबाही हुने जनाउनुभयो । 

अभियानमा महासचिव बिष्णु प्रसाद शर्माले आसन्न प्रतिनिधी सभा सदस्य निर्वाचन २०८२ मा बालबालिकाको प्रयोग नगर्न कर्णाली सबै दलहरु प्रतिबद्ध रहेको जनाउनुभयो । 

निर्वाचन कार्यालयका प्रमुख मोहनलाल केसीले निर्वाचनमा आचारसंहिता उल्लंघन भएको खण्डमा मुख्य निर्वाचन अधिकृतको कार्यालयमा सूचना तथा उजुरी दिन सकिने बताउनुभयो । सामाजिक सञ्जालमार्फत आचारसंहिता उल्लंघनका घटनाहरु बढी हुने गरेको तर नियन्त्रणमा चुनौति रहेको उहाँको भनाइ छ । केसीले निर्वाचनमा सहभागी सबै दलहरुले आफ्नो प्रतिबद्धताहरु मुख्य निर्वाचन अधिकृतको कार्यालयमा बुझाउनुपर्ने समेत जनाउनुभयो । 

रुकुमेली समाज विकास केन्द्रसँगको सहकार्यमा भएको छलफल कार्यक्रममा गैरसरकारी सस्था महासंघका जिल्ला अध्यक्ष भिमराज ओली, नेपाल पत्रकार महासंघका उपाध्यक्ष देवकुमार ओली, विभिन्न राजनीतिक दलका प्रतिनिधिहरु, संघसस्थाका प्रतिनिधीहरु, पत्रकारहरु लगायतको उपस्थिति रहेको थियो । 

यसैबिच अभियानले विभिन्न राजनीतिक दलका प्रतिनिधिहरुलाई आचारसंहिताका प्रतिबद्धता पोष्टरहरु समेत उपलब्ध गराएको छ ।