निर्वाचन प्रहरीमा छैठौं पटक खटिए रुकुमका खड्का

रुकुम पश्चिमको मुसिकोट नगरपालिका –२ रातामाटा निवासी ५२ वर्षीय टेकबहादुर खड्का छैठौ पटक निर्वाचन प्रहरीमा खटिनुभएको छ ।

२०५१ सालको मध्यावधी निर्वाचनमा तत्कालिन म्यादी प्रहरीमा भर्ना हुनुभएका उहाँ २०८२ फागुन २१ मा हुने प्रतिनिधीसभा सदस्य निर्वाचनका लागि खटिनु भएको छ । 

स्वच्छ, निश्पक्ष र भयरहित वातावरणमा निर्वाचन गराउन सुरक्षाको जिम्मेवारीमा लागेको छैठौ पटकको जिम्मेवारीले उहाँलाई गौरव लागेको छ । खड्काले २०५१ सालको मध्यावधी निर्वाचन, २०७४ र २०७९ मा फरक समयमा भएका स्थानीय, प्रदेश र संघीय निर्वाचन र २०८२ को प्रतिनिधी सभा सदस्य निर्वाचनमा कर्तव्यनिष्ठ भएर खटिन पाउँदा गर्व लागेको बताउनुभयो । देशको महत्वपूर्ण परिस्थितीमा सेवक भएर योगदान दिनु जिम्मेवार नागरिकको कर्तव्य भएको उहाँको बुझाई छ । 

दुई छोरी, एक छोरा र श्रीमतीको लालनपालन तथा घर खर्च र राष्ट्रिय दायीत्व निर्वाहको लागि निर्वाचन प्रहरी रोजेको खड्काले बताउनुभयो । वैदेशिक रोजगारीको लागि भारत, साउदी अरब, कतार गएको बेला २०५६, २०६४ र २०७० को निर्वाचनमा योगदान गर्न नपाएकोमा खड्कालाई पछुतो छ ।

रुकुमपश्चिमस्थित सशस्त्र प्रहरी बल नेपाल ४७ नं. गुल्मले सञ्चालन गरेको निर्वाचन प्रहरी अनुशिक्षण तालिमको अन्तिम प्रवचन कार्यक्रममा खड्काले राष्ट्रलाई चाहिएको बेला योगदान दिन पाउनु खुशी र गौरवको बिषय भएको उल्लेख गर्नुभयो । 

२०५१ को निर्वाचनमा सानीभेरी गाउँपालिका –१ को चाईनाबगरमा खटिएको स्मरण गर्नुहुँदै खड्काले त्यो बेला सञ्चार, यातायात सुविधा र अहिलेजस्तो सचेत नागरिक नहुँदा सुरक्षा अवस्थामा बढी नै चुनौती हुने गरेको सुनाउनुभयो । त्यो बेला मतदानस्थलको मुख्य प्रवेशद्वारमा खटिनुभएका खड्काले ढुङगामुढा, नाराबाजी र होहल्ला हुँदा पनि भिडलाई सम्झाई बुझाई गरेर शान्तपूर्वक मतदान कार्य सम्पन्न गर्न सकेको बताउनुभयो ।

आफ्नो त्यहि योगदानको कारण आफु खटिएका सबै निर्वाचनमा महत्वपूर्ण जिम्मेवारी पाउने गरेको खड्काको भनाइ छ । यस बिचमा यहाँले बाँफिकोट, चौरजहारी र जिल्ला प्रहरीकै निर्वाचन सेलमा रहेर सुरक्षाकर्मीको भूमिका निभाउनुभएको छ । 

खड्काले सेवा, सुविधा, सिकाइ र जिम्मेवारीका हिसाबले पहिलाभन्दा अहिलेका निर्वाचनमा धेरै फरक रहेको बताउनुभयो । २०५२ सालमा म्यादी प्रहरी हुँदा तीन हजार रुपियाँ पाएको उहाँले जनाउनुभयो । म्यादी प्रहरीको सट्टा निर्वाचन प्रहरी भन्दा राम्रो लागेको र अहिलेको तालिम, अनुशासन, शैली र बिषयवस्तुले आफुलाई थप जिम्मेवार बनाएको खड्काको बुझाई छ । 

सशस्त्र प्रहरी बल नेपाल ४७ नम्वर गुल्मका प्रहरी निरीक्षक झक्कुप्रसाद शर्माले खड्काको विगतको अनुभव र देशप्रतिको सच्चा भाव अन्य निर्वाचन प्रहरीहरुको लागि समेत प्रेरक रहेको बताउनुभयो । अनुशासित, अनुभवी, इमानदार र परिपक्व निर्वाचन प्रहरीको रुपमा उहाँ चिनिनुहुन्छ ।

उहाँले विगतका चुनावको अनुभव, सुरक्षा अवस्था, मतदाताको शैली, निर्वाचन प्रहरीले गरेको योगदान सुनाउँदा अन्यलाई पनि चाखलाग्दो र सिक्न लायक बिषय हुने गरेको छ । खड्काले पनि आफुलाई सबैले सम्मान गर्ने गरेको बताउनुभयो ।