भोलीबाट रुकुम पश्चिमका १ हजार ८५० किशोरीलाई एचपिभी खोप लगाईदै

रुकुम पश्चिममा भोली मंगलबारबाट पाठेघरको मुखको क्यान्सर रोग विरुद्ध नियमित एचपिभी खोप अभियान सुरु हुने भएको छ । 

जिल्लाका सबै पालिकाहरुमा माघ २७ गतेदेखि फागुन १ गतेसम्म एचपिभी खोप अभियान सञ्चालन हुने स्वास्थ्य सेवा कार्यालय रुकुम पश्चिमले जानकारी दिएको छ । 

स्वास्थ्य सेवा कार्यालयका जनस्वास्थ्य अधिकृत हरि पुनका अनुसार विद्यालय तहमा अध्ययनरत १० देखि १४ वर्ष उमेर समूहका किशोरीलाई लक्षित गरेर एचपिभी खोप अभियान सञ्चालन गर्न  लागिएको हो । खोप अभियानको लक्ष्य पाठेघरको मुखको क्यान्सर रोग निवारण गर्नु रहेको बताईएको छ।

उहाँका अनुसार नियमित  खोप कार्यक्रम अन्तर्गत जिल्ला भरका एक हजार ८५० जना किशोरीलाई खोप लगाउने लक्ष्य राखिएको छ । जसमध्ये विद्यालयमा अध्ययनरत एक हजार ७७९ र विद्यालयको पहुँच बाहिरका ७१ गरेर कुल १८ सय ५० रहेका छन् ।

स्वास्थ्य सेवा कार्यालयका खोप सुपरभाईजर अधिकृत कृष्णा खड्काका अनुसार कक्षा ६ मा अध्ययनरत बालिकाहरूलाई यो खोप लगाइने छ । त्यस्तै विद्यालय बाहिर रहेका १० वर्षका बालिकालाई पनि यो खोप दिइने बताईएको छ । 

त्यसैगरी अघिल्लो वर्ष खोप लिन छुटेका कक्षा ७ देखि १० सम्मका ११ देखि १४ वर्ष उमेरका तथा विद्यालय बाहिर रहेका ११ वर्ष देखि १४ वर्ष उमेर समूहका बालिकालाई पनि यो खोप लगाइने छ । एचपिभी खोप सञ्चालनका लागि जिल्लाभरका १२८ विद्यालय र ७६ स्वास्थ्य केन्द्रहरूबाट खोप सञ्चालन गरिने खड्काले जानकारी दिनुभयो । 

विद्यालयमा दिइने एचपिभी खोप कार्यक्रममा १२८ जना स्वास्थ्यकर्मी खटिने  र विद्यालयमा छुट भएका किशोरीका लागि भने स्वास्थ्य संस्थाबाटै उक्त खोप दिने व्यवस्था मिलाइएको उहाँले जानकारी दिनुभयो । 
स्वास्थ्य सेवा कार्यालयले ढुक्कसँग खोप लगाउन अनुरोध गरेको छ ।

जिल्ला समन्वय समितिका उपप्रमुख देवबहादुर विकको अध्यक्षतामा भएको कार्यक्रममा जिल्ला समन्वय अधिकारी मेघराज सोनी, स्वास्थ्य सेवा व्यवस्थापक डाक्टर जीवन परियार, विभिन्न सङ्घसंस्थाका प्रमुख तथा प्रतिनिधि, पत्रकार लगायतको सहभागिता रहेको थियो । कार्यक्रमको सञ्चालन स्वास्थ्य सेवा कार्यालयका खोप सुपरभाइजर अधिकृत कृष्णा खड्काले गर्नुभएको थियो ।