रुकुममा खेल्ने क्रममा रुखले च्यापिएर बालकको मृत्यु

रुकुम पश्चिमको त्रिवेणी गाउँपालिका–३ हाईबाङमा खेल्ने क्रममा रुखले च्यापिँदा एक बालकको मृत्यु भएको छ ।

आज बिहान झुलनेटा–खुम्चेरी जोड्ने निर्माणाधीन नयाँ भित्री सडक खण्डमा उक्त घटना भएको हो।

जिल्ला प्रहरी कार्यालय रुकुम पश्चिमका अनुसार रा १ क १०१७ नम्बरको स्काईभेटरले सडक निर्माणका क्रममा रुख ढालेर सडकको छेउमा राखिएको थियो । राखिएका रुखमा खेल्ने क्रममा रुख पल्टिँदा त्रिवेणी गाउँपालिका–३ हाईबाङ बस्ने लोकबहादुर ओलीका ८ वर्षीय छोरा मनोज ओली रुखले च्यापिएर गम्भीर घाइते भएका थिए।

घाइते बालकको अवस्था गम्भीर भएपछि उपचारका लागि जिल्ला अस्पताल सल्ले लैजाने क्रममा बाटोमै मृत्यु भएको प्रहरीले जनाएको छ ।

घटनाको जानकारी पाएलगत्तै प्रहरी चौकी झुलनेटाबाट प्रहरी सहायक निरीक्षक विजय ओलीको कमाण्डमा ५ जनाको प्रहरी टोली घटनास्थलमा खटिएको थियो। रुख काटेर सडक छेउमा राखेको बिषयमा स्काईभेटर चालकलाई प्रहरी चौकी झुलनेटाले नियन्त्रणमा लिइएको प्रहरीले जनाएको छ।

घटनाका सम्बन्धमा थप अनुसन्धान भइरहेको प्रहरीले जनाएको छ।