महिला, बालबालिका तथा शिक्षा शाखाका कर्मचारीलाई दुई दिने तालिम

सामाजिक विकास कार्यालय रुकुम पश्चिमले स्थानीय तह अन्तर्गत महिला, बालबालिका र शिक्षा शाखामा कार्यरत कर्मचारीहरुलाई लक्षित गरेर दुई दिने क्षमता विकास तालिम सुरुवात गरेको छ । 

सामाजिक विकास कार्यालयका निमित्त प्रमुख ध्रुवकुमार बाँठाका अनुसार तालिममा विद्यालय तहमा बढ्दै गएको लागू औषध दुर्व्यवसनी, सुधारका अभ्यास तथा बालविवाह न्यूनीकरण, १६ औ योजना, तनाव व्यवस्थापन, भाषिक शुद्धता, ज्येष्ठ नागरिकका कानुनी अधिकार, महिला बालबालिका तथा अपाङ्गता सम्बन्धीका व्यवस्थाहरुको बारेमा जानकारी गराइने छ । 

निमित्त प्रमुख बाँठाका अनुसार तालिममा टिप्पणी लेखन तथा अभिलेख व्यवस्थापन, समावेशीकरण, समानता तथा समता लगायतका बिषयमा सहजीकरण गरिनेछ । 

तालिममा जिल्लाका ६ वटै स्थानीय तहका महिला तथा बालबालिका र शिक्षा शाखामा कार्यरत कर्मचारीहरूको सहभागिता रहेको छ । 
उक्त तालिमको आज एक कार्यक्रमका बिच जिल्ला समन्वय समितिका उपप्रमुख देवबहादुर विकले उद्घाटन गर्नुभएको हो ।  

तालिम उद्घाटन कार्यक्रममा जिल्ला समन्वय अधिकारी मेघराज सोनी, मुसिकोट नगरपालिकाका शिक्षा शाखा प्रमुख बिनाराम खड्का, सुरक्षा निकाय, पत्रकार लगायतको उपस्थिति रहेको थियो । तालिम उद्घाटन कार्यक्रमको सञ्चालन सामाजिक विकास कार्यालयकी महिला विकास निरीक्षक डिलाकुमारी न्यौपानेले गर्नुभएको थियो ।

तालिमको सहजीकरण जिल्ला समन्वय अधिकारी मेगराज सोनी, हुलाक अधिकृत कुमारी रिमा मल्ल लगायतले गर्नुहुने बताईएको छ ।