आसन्न निर्वाचनलाई सफल बनाउन रुकुमका जनप्रतिनिधिहरु तयार 

रुकुम पश्चिमका जनप्रतिनिधिहरुले आसन्न प्रतिनिधि सभा सदस्य निर्वाचनमा पुरापुर सहयोग गर्न तयार रहेको जनाएका छन् ।

आईतबार जिल्ला प्रशासन कार्यालयमा फागुन २१ गतेको प्रतिनिधि सभा सदस्य निर्वाचनका बिषयमा भएको अन्तरक्रिया कार्यक्रममा जिल्ला समन्वय समिति प्रमुख तथा विभिन्न पालिकाका प्रमुखहरुले मतदान केन्द्र देखि कर्मचारी व्यवस्थापनका कार्यमा सहयोग गर्न तयार रहेको जनाएका हुन् । 

जिल्ला समन्वय समितिका प्रमुख लुम्बिनी गौतमले जिससको तर्फबाट निर्वाचनलाई शान्तिपूर्ण र मर्यादित बनाउन भूमिका खेल्ने प्रतिबद्धता जनाउनुभयो । उहाँले कसैलाई दोषरोपण नगरीकन चुनाबमा जान आह्वान गर्दै कुरामा भन्दा पनि व्यवहारमा चुनावी आचारसंहिता पालना गरेर देखाउन आवश्यक रहेको बताउनुभयो । 

कार्यक्रममा मुसिकोट नगरपालिकाका प्रमुख महेन्द्र केसीले पालिका र जनप्रतिनिधिहरुको भूमिका निर्वाहमा तत्पर रहेको बताउनुभयो । उहाँले दलहरुले आचारसंहिता पालनामा प्रतिबद्धता जनाएतापनि विगतका चुनावमा उल्लघंनमा प्रतिश्पर्धा गरेको जस्तो देखिने उल्लेख गर्नुभयो । जेनजी आन्दोलनपछि फरार भएका कैदीबन्दी, हराएका हतियार, नयाँ र पुराना दलहरु बिच चलेको निशेधको राजनीति निर्वाचनको चुनौति रहेकोले बिशेष ध्यान दिनुपर्ने उहाँको भनाई छ । 

कार्यक्रममा सहभागी चौरजहारी नगरपालिकाका प्रमुख पुष्प वादीले जनप्रतिनिधिहरु जिम्मेवारीबाट नडगमगाउने बताउनुभयो । भएका नीति, नियम र कानूनहरुको सहि कार्यान्वय गर्नुपर्नेमा जोड दिनुहुँदै नगर प्रमुख बादीले निर्वाचन सफल बनाउन साथ दिने र सहजीकरणका लागि तयार रहेको उल्लेख गर्नुभयो । 

त्यसैगरी त्रिवेणी गाउँपालिकाका अध्यक्ष गणेश कुमार केसीले निर्वाचनलाई सहज तरिकाले सम्पन्न गर्न र गराउन पालिका तयार रहेको बताउनुभयो । उहाँले दलहरुको सकारात्मक सक्रियता अपेक्षा गरेको जनाउनुभयो । 

सानीभेरी गाउँपालिकाका अध्यक्ष बिर्खबहादुर बिष्टले पनि स्वच्छ, शान्तीपूर्ण र भयरहित वातावरणम निर्वाचन हुनुपर्ने र त्यसका लागि पालिकाको तर्फबाट चाहिने सहायेग गर्न तयार रहेको बताउनुभयो । बजेट र अन्य कार्यक्रम कार्यान्वयनको चटारोको बिच पनि पालिकाका कर्मचारीहरु निर्वाचनमा परिचालन गर्न स्थानीय तह तयार रहेको उहाँले उल्लेख गर्नुभयो । 

अन्तरक्रिया कार्यक्रममा जिल्ला न्यायाधीश तथा मुख्य निर्वाचन अधिकृत दिपेन्द्र थापा मगरले राम्रो परिणाम आउने गरी आचारसंहिताको पालना गुर्नपर्ने बताउनुभयो । निर्वाचनलाई शान्तिपूर्ण वातावरणमा सम्पन्न गर्नका लागि आआफ्नो क्षेत्रबाट सहयोग गर्न राजनीतिक दल, जिल्ला समन्वय समिति, पालिका सरकार तथा सम्पूर्ण सरोकारवालाहरु तयार हुनु मुख्य कुरा भएको उहाँको भनाइ छ । 

कार्यक्रममा जिल्ला निर्वाचन अधिकारी मोहनलाल केसीले जिल्लामा हालसम्म भएको निर्वाचन तयारीका विषयमा जानकारी गराउनुभएको थियो । 

कार्यक्रमका अध्यक्ष एवम् प्रमुख जिल्ला अधिकारी दिनेशप्रसाद थानीले मुख्य निर्वाचन अधिकृतको कार्यालय उपलब्ध गराउने जिल्ला समन्वय समिति, आचारसंहिता पालनाको प्रतिबद्धता जनाउनुहुने राजनीतिक दलका प्रमुख एवम् प्रतिनिधिहरु, चुनावमा सहयोगको प्रतिबद्धता गर्नुहुने पालिका प्रमुख लगायतलाई बिशेष धन्यवाद दिनुभएको थियो । 

कार्यक्रमको सञ्चालन सहायक प्रमुख जिल्ला अधिकारी केशवप्रसाद ओलीले गर्नुभएको थियो ।