आठबिसकोटको बाँकेज्युलामा जिप दुर्घटना हुँदा चालकसहित १२ जना घाईते

रुकुम पश्चिमको आठबिसकोट नगरपालिका -१४ बाँकेज्युलास्थित भेरीकरिडोरमा जिप दुर्घटना भएको छ । 

शुक्रबार दिउँसो जिल्ला सदरमुकाम मुसिकोट खलंगाबाट आठबिसकोटको राडी बजारतर्फ जाँदै गरेको लु १ ज २०८२ नम्वरको जिप दुर्घटना भएको हो । 

दुर्घटनामा परेर चालकसहित १२ जना घाईते भएका छन् । जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरि प्रसाद पुनका अनुसार घाईते हुनेहरुमा आठबिसकोट नगरपालिका १३ घेत्मा निवासी ३१ वर्षीय चालक राज बिक र सोहि स्थान निवासी ३१ वर्षीय सहचालक डिलबहादुर बिक रहनुभएकाे छ । 

त्यसैगरी अन्य घाईते हुनेहरुमा आठबिसकोट नगरपालिका १३ निवासी ३४ वर्षीय प्रकाश जंग मल्ल, वडा नम्वर १२ निवासी १७ वर्षीया रिता परियार, वडा नम्वर ८ निवासी १९ वर्षीया बिमला केसी, वडा नम्वर ९ निवासी ३२ वर्षीया बसन्ता शाह, रुकुम पूर्वको भूमे गाउँपालिका २ निवासी २२ वर्षीय बिजय बुढा र सल्यानको बागचौर नगरपालिका ८ निवासी २७ वर्षीय जनक चन्द रहेका छन् । घाईत मध्य अन्य चार जनाको नामथर र ठेगाना खुल्न नसकेको प्रहरीले जनाएको छ । 

घाईते मध्य रिता परियारको अवस्था गम्भिर रहेको छ भने अन्यको अवस्था सामान्य रहेको छ । घाईतेहरुलाई उपचारका लागि आठबिसकोट नगर अस्पताल लिईएको प्रहरी निरीक्षक पुनले जानकारी दिनुभयो ।

घटनास्थलमा इलाका प्रहरी कार्यालयबाट प्रहरीको टोली पुगेर उद्धार गरिरहेको छ । ब्रेक फेल गएको कारण सडकबाट १५ मिटर तल खस्न गई जिप दुर्घटना भएको बताईएको छ ।