रुकुम पश्चिममा बोलेरो, मोटरसाइकल र अटो एकआपसमा ठोक्किँदा एक जनाको मृत्यु, दुई जना घाइते

रुकुम पश्चिमको आठबिसकोट नगरपालिका –११ सिमबजार नजिक भेरी करिडोरमा आज दिउँसो भएको सवारी दुर्घटनामा एक जनाको मृत्यु भएको छ भने दुई जना घाईते भएका छन् । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरि प्रसाद पुनका अनुसार मंगलबार दिउँसो चिसापानीबाट राडी बजारतर्फ जाँदै गरेको लु १ ज ४५७९ नम्वरको बोलेरो जिप र विपरित दिशाबाट जाँदै गरेको क.प्र. ०३–००१ प ०९२० नम्वरको मोटरसाइकल एक आपसमा ठोक्किएका थिए ।  

अनियन्त्रित हुँदै उछिटिएको सो मोटरसाइकल धुर्सेनीबाट राडी बजार आउँदै रहेको लु.प्र.०२–०००१ ह ०१९२ नम्वरको अटोसँग समेत ठोक्किएपछि दुर्घटना थप गम्भीर बनेको प्रहरीले जनाएको छ ।

दुर्घटनामा परेर मोटरसाईकल चालक जाजरकोटको नलगाड नगरपालिका ८ निवासी ३५ वर्षीय सिताराम चदाराको मृत्यु भएको प्रहरी निरीक्षक पुनले जानकारी दिनुभयो । उहाँका अनुसार दुर्घटनामा परेर मोटरसाईकलमा सवार नलगाड नगरपालिका ८ का १६ वर्षीय नवराज चदारा र आठबिसकोट नगरपालिका ११ का १४ वर्षीय कमल सुनार घाईते भएका छन् । घाईतेहरुलाई आठबिसकोट नगर अस्पतालमा लिईएको छ भने अटोमा सवार चार जनाको अवस्था सामान्य रहेको छ । 

बोलेरोका चालक आठबिसकोट नगरपालिका १३ का २२ वर्षीय  टेकबहादुर खत्री र अटोका चालक आबिसकोट नगरपालिका ११ निवासी २८ वर्षीय रामबहादुर खत्री रहेको प्रहरीले जनाएको छ । बोलेरो चालकलाई प्रहरीले नियन्त्रणमा लिएको जनाएको छ । घटनाबारे थप अनुसन्धान भइरहेको बताईएको छ ।