रोजगारीका लागि भारत गएका सल्यानका चार जनाको मृत्यु

भारतमा रोजगारीका सिलसिलामा गएका सल्यानका चार जनाको गाडी दुर्घटनामा मृत्यु भएको छ भने तीन जना घाइते भएका छन्। जिल्लाको कुमाख गाउँपालिका–४ बस्नेत जिल्लाका एकै गाउँका ४ जनाको हिमाचल प्रदेशको सिम्ला जिल्ला, कोटखाइमा पिकअप गाडी दुर्घटना हुँदा मृत्यु भएको हो । 

मृत्यु हुनेमा ३६ वर्षीय राजेश बिष्ट, ४८ वर्षीय डिल्ली शाही, ३७ वर्षीय एकेन्द्र शाही र २६ वर्षीया लक्ष्मी शाही रहेको कुमाख–४ का वडाध्यक्ष शोभिलाल बस्नेतले जानकारी दिनुभयो । उहाँका अनुसार घाइते हुनेमा सोही गाउँका २६ वर्षीय हिमबहादुर शाही, ३६ वर्षीय नेवबहादुर शाही र २२ वर्षीय हेमन्त शाही रहेका छन् ।

आइतबार बिहान करिब ९ बजे डेराबाट एक घण्टाको दूरीमा काममा जाँदै गर्दा एचपी ६३–७८९७ नम्बरको पिकअप जीप भीरमा खस्दा दुर्घटना भएको हो। गत साउनमा रोजगारीका लागि भारत पुगेका उनीहरू दुर्घटनामा ज्यान गुमाएपछि गाउँ शोकमा डुबेको वडाध्यक्ष बस्नेतले बताउनुभयाे ।

तीन जना मृतक एकै परिवारका हुन्। प्रारम्भिक अनुसन्धान अनुसार चालकले नियन्त्रण गुमाउँदा गाडी दुर्घटनामा परेको हो। लक्ष्मी शाहीलाई गम्भीर घाइते अवस्थामा अस्पताल पुर्‍याइएकाे थियो तर उपचारकै क्रममा मृत्यु भएको प्रहरीले जनाएको छ । 

यस्तै, गम्भीर घाइते डिल्ली शाहीलाई इन्दिरा गान्धी मेडिकल कलेज अस्पताल पठाइएको थियो तर उपचारका क्रममा उनको पनि मृत्यु भयो । घाइते दुई जनालाई उपचारपछि कोटखाइ स्वास्थ्य केन्द्रबाट डिस्चार्ज गरिएको छ। शवलाई पोष्टमार्टमपछि नेपाल ल्याउने पहल भइरहेको जनाइएको छ।