अपुरो बजेट भएका रुकुम पश्चिमका सात मोटरेबल पुल बहुवर्षिय योजनाको लागि पेश

कर्णाली प्रदेश सरकारले रुकुम पश्चिमका विभिन्न सात स्थानमा मोटरेबल पुल निर्माणका लागि गरेको बजेट व्यवस्थापन अपुरो भएपछि बहुवर्षिय योजनाको लागि पेश गरिएको छ । आर्थिक वर्ष ०८२/०८३ मा सात वटा पुल निर्माणका लागि १० करोड ५० लाख बजेट व्यवस्था गरिएको हो । 

उक्त बजेटले पुल निर्माण कार्य पुरा नहुने भएपछि बहुवर्षिय योजनामा समावेश गर्नका लागि भौतिक पूर्वाधार तथा शहरी विकास मन्त्रालयमा फाईल पेश गरिएको पूर्वाधार विकास कार्यालय चौरजहारीले जनाएको छ ।

कार्यालयका प्रमुख ईन्जिनियर रामचन्द्र बिसीका अनुसार चालु वर्षमा रुकुमपश्चिमको प्रदेश निर्वाचन क्षेत्र ‘क’ अन्तर्गत सात स्थानमा मोटरेबल पुल निर्माणका लागि स्वीकृत योजनालाई बहुवर्षीय योजनामा राख्नको लागि फाईल पेश भएको छ । फाईल स्विकृत भएमा मात्र कार्यान्वयनमा जाने उहाँको भनाइ छ । 

कार्यालयका अनुसार राप्ती राजमार्ग अन्तर्गत बाँफिकोट गाउँपालिकाको छिनखेतमा पुल निर्माणका लागि यस वर्ष दुई करोड रुपियाँ विनियोजन भएको छ भने बाँफिकोटकै वडा नम्वर १ र २ जोड्ने पुमा खोलामा पुल बनाउन तीन करोड रुपियाँ विनियोजन भएको छ ।

त्यसैगरी सानीभेरी गाउँपालिका ५ र ६ जोड्ने देउताखोलामा मोटरेबल पुल निर्माणका लागि एक करोड, आठबिसकोट नगरपालिका १० र १२ जोड्ने घारीखोला पुलको लागि एक करोड ५० लाख, सोहि स्थानको कालाखोलामा पुल बनाउन एक करोड, मुसीकोट नगरपालिका ११ र ४ जोड्ने साँखखोलामा पुल निर्माणका लागि एक करोड र मुसिकोट नगरपालिको चुनाखोलामा पुल निर्माणका लागि एक करोड रुपियाँ मात्र स्वीकृत भएको छ । 

विस्तृत परियोजना प्रतिवेदन (डिपिआर) तयारी, सर्वेक्षण, ठेक्का लगायतका कामसहित पुल निर्माणका लागि उक्त बजेट अपुग हुने भएकोले बहुवर्षिय योजनामा समावेश गर्न आवश्यक रहेको पुर्वाधार विकास कार्यालयका प्रमुख ईन्जिनियर बिसीले जनाउनुभयो । बहुवर्षिय योजनामा समावेश नगरी योजना सुरु गर्दा बजेट अभावमा पुलहरु अलपत्र हुने, राज्यको लगानी खेर जाने जोखिम रहने गर्दछ । 
कर्णाली प्रदेशसभा सदस्य महेन्द्र केसीले बाँफिकोट गाउँपालिकाको प्रवेशद्वारका रुपमा रहेको छिनखेतका साथै पुुमाखोला, घारीखोला, कालाखोला, देउताखोला, साँखखोला र चुनाखोलामा पुल नहुँदा सर्वसाधारणहरुले हरेक वर्ष क्षति बेहोर्दै आएको जनाउनुभयो । यसका साथै बालबालिकाहरुलाई विद्यालय आउजाउमा समस्या हुने गरेको, वर्षायाममा यातायात सेवा अवरुद्ध हुने गरेको उहाँको भनाइ छ ।

केहि बजेट विनियोजन गरेर डिपिआर, सर्भे लगायतका काम सुरु भईसकेको र बहुवर्षिय योेजनामा समावेश गराउन थप पहल भएको उहाँले बताउनुभयो ।  पुलका साथै विभिन्न सडक, विद्यालय भवन, स्वास्थ्य चौकी निर्माणका लागि समेत बजेट व्यस्थापन गरिएको प्रदेश सभा सदस्य केसीले जानकारी दिनुभयो ।

बजेट व्यवस्थापन भएका योजनाहरु समयमै सर्भे र टेण्डरको प्रक्रियामा जाने उहाँको भनाइ छ । केसीले सबै सरोकारवालापक्षले छिटो, गुणस्तरिय, पारदर्शी र जनसहिभागितामूलक ढंगले काम सम्पन्न गर्नु मुख्य जिम्मेवारी हुने समेत उल्लेख गर्नुभयो ।