ग्रिनकार्ड पाएको एक हप्ता भएको थियो, गाडीको ठक्करले अमेरिकामा एक रुकुमेलीको ज्यानै लियो

रुकुम पश्चिमको बाँफिकोट गाउँपालिका -३ नेपाने घर भई अमेरिकामा रहनुभएका २० वर्षीय ओपेन्द्र बोहराको गाडी दुर्घटनामा परेर मृत्यु भएको छ । 

अमेरिकाको टेक्सासमा शुक्रबार बिहान (नेपाली समय अनुसार शुक्रबार बेलुका) गाडीको ठक्करबाट बोहरा गम्भिर घाईते हुुनुभएको थियो ।  

उहाँका आफन्तजनहरुको अनुसार अस्टिनको सेभेन इलाभेनमा कार्यरत बोहरा नाइट ड्युटी सकाएर कोठा फर्किने क्रममा गाडीले ठक्कर दिएको थियो । लगत्तै उपचारका लागि प्रहरीले अस्पताल पुर्‍याएकोमा आज बिहान (नेपाली समय अनुसार आईतबार) उहाँको उपचारको क्रममा मृत्यु भएको हो । 

बोहरालाई ठक्कर दिने गाडीको पहिचान हुन नसकेको र अनुसन्धान भइरहेको सूचना प्राप्त भएको छ । बोहरा अमेरिका पुगेको करिब नौ महिना पुगेको थियो  । उहाँले एक साता अघि मात्र ग्रिन कार्ड प्राप्त गर्नुभएको थियो ।

उहाँको दाहसंकार अमेरिकामै गर्ने वा नेपाल ल्याउने भन्ने बिषयमा अमेरिकास्थित नेपाली र आफन्तजनहरु बिच सल्लाह भईरहेको बताईएको छ ।