टिप्पर दुर्घटनामा बेपत्ता चालकको शव भेटियो, दुई जना अझै बेपत्ता

गत मंगलबार ठुलीभेरी नदीमा टिप्पर खस्दा बेपत्ता तीनजनामध्ये चालकको शव फेला परेको छ ।

जिल्ला प्रहरी कार्यालय रुकुम पश्चिमका प्रहरी नायब उपरीक्षक (डीएसपी)प्रमेश विष्टका अनुसार टिप्पर चालक दाङ निवासी ४१ वर्षीय मणिराम चौधरीको शव फेला परेको हो । 

उहाँको शव बिहीबार बेलुका सुर्खेतको भेरीगंगा नगरपालिका २ मा फेला परेको डिएसपी बिष्टले जनाउनुभयो । 

आठविसकोट नगरपालिका -१४ पिपलचौर स्थित भेरी करिडोर सडकखण्डमा चिसापानीबाट छेपारेतर्फ जाँदै गरेको रा.१ क. १५०१ नम्बरको टिपर भेरी नदिमा खसेको थियो । 

टिप्परमा रहेका दुईजनाको अवस्था भने अझैसम्म अज्ञात रहेको छ । रुकुम पश्चिमको सानिभेरी गाउँपालिका ३ बस्ने धनविर विक र रुकुम पूर्वको सिस्ने गाउँपालिका ८ स्यालापाखा बस्ने हरी बिक वेपत्ता रहेको प्रहरीले जनाएको छ । उहाँहरूको खोजी कार्य भइरहेको बताइएको छ ।