भारतमा मृत्यु भएका जुम्लाबाङका प्रेमको परिवारको लागि १२ लाख सहयोग संकलन

गत असार ११ गते भारतको गोवामा मृत्यु भएका रुकुम पश्चिमको मुसिकोट नगरपालिका १२ जुम्लाबाङका प्रेमलाल ओलीको परिवारलाई सहयोगको लागि १२ लाख बढी रकम संकलन भएको छ । रोजगारीको क्रममा देश बाहिर रहेको बेला ओलीको असामयिक निधन भएको थियो । 

उहाँको निधन पश्चात पारिवारीक अवस्था कमजोर रहेकाेले पीडित परिवारको सहयोगका लागि उहाँका आफन्जनहरुले सामाजिक सञ्जाल मार्फत सहयोग संकलन अभियान सञ्चालन गर्नुभएको थियो । असार २४ गतेसम्म मृतकका परिवारको सहयोगका लागि विभिन्न व्यक्तिहरुले १२ लाख चार हजार ८४१ रुपियाँ सहयोग गर्नुभएको मृतकका अंकल प्रेम बहादुर ओलीले जानकारी दिनुभयो ।

उहाँका अनुसार शोकको यस घडीमा पीडित परिवारलाई मल्हम लगाउने हेतुले आर्थिक सहयोग अभियान सुरु गरिएको थियो । स्वदेश तथा विदेशमा रहनुहुने मनकारी व्यक्तिहरुले उक्त रकम सहयोग गर्नुभएको उहाँले जनाउनुभयो । उक्त रकम मृतकको श्रीमती जयकला पुनको खातामा जम्मा भएको हो । 

असार ११ गतेदेखि सुरु भएको उक्त अभियान अहिलेलाई भने बन्द गरिएको छ । संकलित उक्त रकम मृतकका नाबालक छोराहरु बिराज ओली र मिलन ओलीको पालनपोषण, शिक्षा र भविष्य निर्माणका उपयोग हुनेगरी खर्च हुने बताईएको छ । त्यसका लागि बैंक खाता सञ्चालन गरेर बचत गरिने समेत जनाईएको छ । 

मृतक ओलीको परिवारका लागि सहयोग संकलन अभियानमा उहाँका नातेदारहरु  रामप्रसाद ओली, प्रेमबहादुर ओली, गोपाल ओली, दिपक ओली, प्रेमबहादुर ओली, डिल्ली बहादुर डाँगी, नवीन ओली, नरेन्द्र ओली र प्रशान्त ओली संलग्न हुनुभएको थियो । उहाँहरुले सबै सहयोगी दाताहरुलाई बिशेष धन्यबाद व्यक्त गर्नुभएको छ । 

मृतक ओली सहिद पुत्र समेत हुनुहुन्छ । उहाँको आमा खलसरी ओलीको २०६१ साल चैत्र  २६ गते तत्कालिन द्वन्द्वको समयमा हत्या भएको थियो ।