खलङ्गामा लागु औषध बिरुद्ध सचेतनामुलक र्‍याली

रुकुम पश्चिमको मुसिकोट नगरपालिका १ खलङ्गामा लागु औषध बिरुद्ध सचेनामुलक र्‍याली निकालिएको छ । 

लागु औषध दुरुपयोग एवम् ओसारपसार विरुद्धको अन्तराष्ट्रिय दिवसको सन्दर्भमा बिहिबार बिहान सचेनामुलक र्‍याली निकालिएको हो । 

जिल्ला प्रशासन कार्यालय रुकुम पश्चिमको आयोजना र मुसिकोट नगरपालिकाको सह-आयोजनामा उक्त कार्यक्रम गरिएको हो । कार्यक्रमा जिल्ला प्रहरी कार्यालय र सशस्त्र प्रहरी बल नेपाल ४७ नं. गुल्म हेड क्वाटरको सहकार्य रहेको थियो । 

दिवसको अवसरमा सप्ताहव्यापी कार्यक्रम गरिएको र समापन कार्यक्रमको क्रममा प्रभातफेरी गरिएको प्रमुख जिल्ला अधिकारी कुल बहादुर जी.सी.ले जानकारी दिनुभयो । लागु पदार्थ होईन जीवन नै रोजौ भनेर सन्देश प्रवाह गर्न र्‍याली निकालिएको उहाँले बताउनुभयो ।

र्‍यालीमा विद्यार्थी, सुरक्षाकर्मी, व्यवसायी, कर्मचारीहरुको सहभागिता रहेको थियो । सचेनामुलक प्लेकार्ड, नाराबाजी सहित जिल्लाको मुखय बजार खलंगा परिक्रमा गरिएको थियो । 

“स्वस्थ, सभ्य र सुरक्षित समाजको प्रतिवद्धता : लागु औषध दुरुपयोग विरुद्ध ऐक्यवद्धता” भन्ने मुल नाराका साथ सप्ताह व्यापी दिवस विशेष कार्यक्रमको अन्तिम दिन प्रभातफेरी निकालिएको हो । 

कार्यक्रम समापनको अवसरमा मुसिकोट नगरपालिकाका प्रमुख महेन्द्र केसी, प्रमुख जिल्ला अधिकारी कुल बहादुर जी.सी. र प्रहरी नायब उपरीक्षक प्रमेश बिष्टले लागु पदार्थको सेवनले हुने हानी र यसको दुरुपयोग रोक्न सबैको सहकार्य आवश्यक रहेको बताउनुभयो ।