रवि लामिछाने माथि राजनीतिक प्रतिशाेध भएको भन्दै जापानमा हस्ताक्षर संकलन

रास्ट्रिय स्वतन्त्र पार्टीका सभापति तथा सांसद रवि लामिछाने माथि राजनीतिक प्रतिशोध भएको भन्दै जापानमा हस्ताक्षर संकलन सुरु गरिएको छ । 

जापानमा रहेका नेपाली समुदायले राजनीतिक प्रतिरोध गरिएको भन्दै आवाज उठाउन थालेका हुन्। 

प्रवास नेपाली सम्पर्क विभाग जापानका अध्यक्ष दिलेन्द्र जोसीको अगुवाइमा जापानका विभिन्न सहरहरू फुकुओका, ओसाका, टोकियो र नागोयामा हस्ताक्षर संकलन कार्यक्रम क्रमिक रूपमा सुरु गरिएको छ।

फुकुओकाबाट सुरु गरिएको अभियानले ओसाका हुँदै टोकियो र नागोयातिर समेत व्यापक समर्थन पाउँदै गएको छ। जापानमा अध्ययनरत विद्यार्थी, कामदार तथा नेपाली समुदायका प्रतिनिधिहरूले उक्त अभियानमा सहकार्य जनाएका छन्। उनीहरूले लामिछानेमाथि भएको घटनालाई राजनीतिक प्रतिशोध भन्दै यसको विरोधमा एकजुट हुनुपर्ने धारणा व्यक्त गरेका छन्।

अध्यक्ष जोसीले भन्नुभयो, “लोकतन्त्र र अभिव्यक्ति स्वतन्त्रताको रक्षा गर्न हामी प्रवासमा रहेका नेपालीहरूले पनि आवाज उठाउनु आवश्यक छ। रवि लामिछानेमाथि भएको अन्यायको विरुद्ध हामी मौन बस्न सक्दैनौं।”

बृहत् भेलासहित अझ सशक्त ढंगले जापानमा हस्ताक्षर संकलन अभियान तिव्र बनाउने बताईएको छ । जापानभरिका सम्पूर्ण शाखा समिति लगायत, सम्पूर्ण शुभचिन्तक, समर्थक, पार्टी सदस्यहरू सबैलाई यस अभियानमा सहभागी हुन आयोजकले अनुरोध गरेको छ ।

यस अभियानको माध्यमबाट संकलित हस्ताक्षरहरू निकट भविष्यमा नेपालमा सम्बन्धित निकायमा बुझाइने र आवश्यक परे थप विरोध कार्यक्रमहरू पनि सञ्चालन गरिने आयोजकको भनाई छ ।