रुकुमको बैरागीठाँटीमा ट्याक्टर र अटो दुर्घटना हुँदा पाँच जना घाईते

रुकुम पश्चिमको मुसिकोट नगरपालिका -४ बैरागीठाँटी नजिकै ट्याक्टर र अटो दुर्घटना हुँदा पाँच जना घाईते भएका छन् । दुर्घटनामा परेर दुबै सवारी साधनका चालकसहित पाँच जना घाईते भएको प्रहरीले जनाएको छ । 

जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक हरी प्रसाद पुनका अनुसार घाईते हुनेहरुमा रुकुम पश्चिमको त्रिवेणी गाउँपालिका २ सिम्रुतु निवासी २२ वर्षीय ट्याक्टर चालक अजय पुन मगर,  त्रिवेणी गाउँपालिका ७ निवासी ४२ वर्षीय अटो चालक कृष्ण बहादुर ओली, सोही गाउँको सेनाखर्क निवासी ३२ बर्षीय राकेश बढाथोकी, मुसिकोट नगरपालिका ११ निवासी ३२ वर्षीय नवराज सार्की र उहाँको ४ वर्षीया छोरी जेनिशा सार्की रहेका छन् ।  

आज (सोमबार) दिउँसो आठबिसकोट नगरपालिका ९ राडीबजारबाट सिम्रुतुतर्फ जाँदै  गरेको रा १ त ५०५८ नम्वर को ट्याक्टरले सोही दिशातर्फ आउँदै गरेको लु.प्र. ०२००१ ह ०४६६ ननम्वरको अटोलाई  ठक्कर दिँदा दुर्घटना भएको प्रहरीले जनाएको छ । 

घाईतेहरुलाई तत्कालै उद्धार गरेर उपचारको लागि सोलाबाङस्थित कर्ण मेडिकलमा ल्याईएको बताईएको छ । अटोमा चालकसहित चार जना सवार रहेको र ट्याक्टर प्रहरीको नियन्त्रणमा रहेको प्रहरीले जनाएको छ । ट्याक्टर चालक मगरको अवस्था सामान्य रहेकोले प्रहरीले आफ्नो नियन्त्रणमा लिएको छ ।

अटो चालक ओली र यात्रु बुढाथोकीको बाँया हातमा चोट रहेको छ भने बालिकाको अनुहारमा चोट रहेको छ । बालिकाका बुवाको अवस्था भने सामान्य नै रहेको प्रहरीले जनाएको छ ।